DILI, STLTIMORLESTE.com – Kompanhia Kafe Atsabe servisu hamutuk ho toos nain Timoroan kuaze 5000 resin neebe mak kobre iha Timor Leste, hodi nunee bele esporta produtu kafe Timor ba nasaun estranjeiru sira.
Nain ba Kompanhia Kafe Atsabe, Mariano da Costa Alvez hatete, Kafe Timor neebe mak sira esporta ba rai liur liu husi servisu hamutuk entre sira ho toos nain kuaze 5000 resin neebe mak kobre iha Timor, hodi nunee bele esporta mos produtu kafe Timor ba nasaun seluk.
Nia hatete, kafe Timor neebe esporta ona ba iha nasaun sira mak hanesan Australia, New Zealand, Japaun, Singapura, Jerman, Afrika no UK. Kafe sira neebe esporta ba nee depende ba nasaun nia husu. Barak liu mak ba Japaun neebe kada tinan sempre haruka kontainer 2 no UK kontainer 2 ka 3 hanesan nee, ba sira seluk mak ida deit.
Nia afirma, iha esportasaun kafe nee fo vantajen diak mai Timor Leste, tanba produsaun kategoria hela hanesan organiku.
“Ita sei iha potensia boot ba merkadu global nian, tanba ita nia rai nee seidauk uza kimiku, neebe ida nee hanesan vantajen boot husi esportasaun kafe nian,” dehan nia ba STL iha Delta, Sesta (14/08/2026).
Nia haktuir, agora daudaun sira iha sentru kafe nian 5 mak iha foho Ermera, Atsabe no Letefoho. Kuaze servisu hamutuk ho toos nain 5000 resin neebe mak kobre iha Timor, nomos iha armajen ida iha Railako neebe hodi haree ba setor kafe nia futuru atu tama iha merkadu espesial.
Nia hatete, atu buat hotu lao diak maske kiik, maibe hanesan kompanhia privadu no nuudar Timor oan, primeiru mak tenke iha esperansa ho hanoin ida nasionalizmu nian katak tenke hamutuk leba hotu todan nasaun nian.
“Dala ruma ita hanoin katak hanesan Timoroan no joven, ita hotu tenke sente no leba hotu saida mak TL iha, hodi nunee ita bele prepara ita nia aan hodi hakat ba merkadu mundial ida neebe agora hakat daudaun mai. Entaun preparasaun ita hotu, primeiru husu ba ita nia aan katak ita nia interese no ambisaun iha aan rasik nee mak saida. Hodi nunee bele lori ida nee sai fali parte ida neebe bele kompete iha ita nia rai,” katak Ameta.
Tuir nain ba Kafe Atsabe nee katak, husi nia parte tanba liga liu ba setor kafe nian, difikuldade neebe Kompanhia nee hasoru ida mak konaba produsaun no ida seluk mak kompetisaun merkadu neebe iha.
“Nuudar Timor oan ita iha kbiit neebe oituan para bele kompete ho maluk sira neebe mak mai husi rai liur. Maibe husi nee ita mos iha oportunidade tanba hanesan Timor oan no nain Kafe Atsabe, ita mos iha esperansa no mehi husi buat neebe mak ita iha, neineik ita sei bele too mos hanesan kolega Timor oan sira seluk,” tenik nia.
Nia katak, nuudar sidadaun Timoroan iha papel imiportante hotu, tanba TL nee ema hotu nian. Neebe bainhira senti todan koko para leba hotu todan sira nee, labele fo todan ba ema ida deit mak leba. Tanba nee labele governu mesak maibe setor privadu hotu tenke hamutuk hodi leba todan neebe nasaun nee iha no servi ho laran tomak, atu nunee futuru nasaun nee sai naroman mos hanesan nasaun seluk.
(dom)
