DILI, STLTIMORLESTE.com – Komisaun Anti Korupsaun (KAK) hamutuk ho Polisia Nasional Investigasaun Kriminal (PNSIK) iha loron Tersa nee halao buska ba iha edifisiu Servisu Rejistrasaun no Verifikasaun Emprezarial (SERVE), neebe lokaliza iha Obrigadu Barak.
Halo buska, ligasaun ho informasaun neebe espalha kona-ba deskonfia kobransa ilegal no mos deskonfia pratika sistema familiarizmu iha rekrutamentu ba servisu balu iha SERVE.
Tuir Komisaru KAK, Rui Pereira katak, atividade ida nebee sira halao kona-ba atividade buska liga ho informasaun balu neebe iha.
“Atividade buska halo tanba iha ligasaun ho kazu neebe mak KAK halo hela prosesu investigasaun, buska nee hahu uluk husi Unidade Informasaun Seguransa KAK nian, iha Diresaun Investigasaun Kriminal nian,” dehan Komisariu KAK, Rui ba jornalista sira iha Farol, Dili,Tersa (25/02/2025).
Nia hatutan, iha SERVE informasaun balu espalha no husi maluk sira neebe hatoo keixa no informasaun neebe KAK rasik inisiativa rekolha, presiza haree fali, se dehan Diretor Ezekutivu ho nia ema sira halo buat ruma la loos, labele rona deit husi media sira, maibe presiza haklean investigasaun hodi haree krimi ruma akontese ka lae.
Ho meius neebe halao KAK hamutuk ho polisia halao servisu koordenasaun polisial, atu asegura KAK nia investigador sira servisu iha terrenu, ema ruma hanoin la diak prosesu sira nee atu hetan impedimentu, atu asegura presiza kolaborasaun ho Polisia Nasional Timor Leste, tanba nee mak iha polisia akompanha investigador sira servisu iha terrenu.
Komisariu dehan, kazu nee liga ho kazu neebe akontese ka espalha iha publiku kona-ba Diretor Ezekutivu SERVE ho nia ema sira, no iha identifikasaun nee foti sira neebe sente sai responsabilidade ba kazu neebe mak atu halo prosesu mak hanesan Diretor Ezekutivu SERVE ho nia Adjunta no mos funsionariu relevante neebe presiza atu halo identifikasaun tuir lei dentru 12 tempu atu halo prosesu.
Nia hatutan, KAK iha sela detensaun, maibe la detein ema ida, tanba tuir kodigu Prosesu Penal detein ema ruma banhira nia halo krimi foun, halai, halakon provas mak detein atu asegura prosesu nee.
Dirijenti neebe KAK foti hodi halo identifikasaun, liga ho kazu neebe mak iha alegasaun hasoru sira, iha video viral no deskonfia buat ruma la loos iha neeba, prosesu rekrutamentu ema no balu halo kobransa, tanba nee KAK halao servisu ruma bazeia ba kompetensia neebe lei atribui ba.
(ter)
