DILI, STLTIMORLESTE.com – Komisariu Komisaun Anti Korupsaun (KAK), Rui Pereira hatete, KAK seidauk simu dokumentus ruma liga ho auditoriu ba Igreja Aimutin nia.
Komisariu Komisaun Anti Korupsaun (KAK), Rui Pereira hatoo kestaun nee ba jornalista sira, bainhira remata halo enkontru ho Prezidente Republika, Jose Ramos Horta iha Palasiu Prezidensial Nicolau Lobato, Bairo Pite, Segunda (10/08/2026).
Komisariu KAK hatete, KAK seidauk simu dokumentus ruma liga ho konstrusaun igreja Aimutin neebe paradu.
Komisariu hatete, konaba konstrusaun Igreja Aimutin mos komisariu labele pronunsia buat ruma, tanba husi dioseze mos halo auditoria, rezultadu auditoria nee Amu Bispu Kardeal mos informa ba publiku sira katak entrega ona ba Governu.
“Auditoriu husi igreja entrega ona ba Governu agora folloup ba Governu atu finaliza projetu nee fila fali ba orsamentu Jeral Estadu sei iha verba ruma bele disponibiliza hanoin Igreja nee bele kontinua. Se iha kazu ruma entrega ba orgaun justisa sira atu halo investigasaun karik osan uluk 3 milhões ital nee ninia lalaok nee keta halo balun mout ba leet deit, entaun nee presiza mos maibe hau hanoin ita hein,” katak Komisariu.
Komisariu hatete, too oras nee Komisaun Anti Korupsaun seidauk simu dokumentus ruma liga ho konstrusaun Igreja Aimutin neebe paradu too oras nee.
“Ami KAK seidauk simu dokumentus ruma mak ligasaun ho igreja Aimutin nia, uluk ami nia ekipa inspesaun no monitorizasaun ba halo monitorizasaun, maibe se mak halo auditoria ho inspesaun neebe mak formal nee husi AND sira ho obras publika, se iha falhansu ka laiha falhansu, hau hanoin nain hira media ba husu took Igreja Aimutin, orsamentu nee mai husi Gabinete Primeiru Ministru nia, tuir Komisariu nia hatete ami mos sarani husi Aimutin mos 3 mill ital nee fora ami nuudar sarani nia kontribuisaun,” Katak Komisariu KAK.
Antes nee ekipa halo prosesu fiskalizasaun, inspeksaun no monitorizasaun ba parte tekniku no fíziku hetan envolvimentu husi Ajensia Dezenvolvimentu Nasional (ADN), Gabinete Apoiu Sosiedade Sivil (GASC), no Paroku Aimutin molok kontinua obra nee.
Nunee mos konaba konstrusaun ba igreja Aimutun orsamentu Governu prevee subvensaun ho total milhaun US$ 3 tuir rezolusaun limitasaun ba konstrusaun igreja. Total orsamentu neebe presiza tuir dadus tekniku no BoQ hamutuk milhaun US$ 4.8, tan nee falta tan US$ milhaun 1.5 too 1.8.
(eme)
