DILI, STLTIMORLESTE.com – Prezidente Komisaun Rekrutamentu Kandidatu Estudante Akademia Militár 2026, Nuno Corvelo hateten, kandidatu akademia militar konjunta hamutuk nain 124 submete ona ba prova kulturál.
Nia dehan, total aplika hamutuk nain 320 no iha nain 214 deit mak liu faze apuramentu no ohin loron tuir ona prova kulturál.
“Kandidatu sira nee selesiona husi munisípiu sira, nunee komisaun halo verifikasaun ba sira nia dokumentu iha ema nain 320 no nain 124 mak liu selesaun dokumentu, agora sira neebe liu nee submete mai prova kulturál. Prosesu ida nee importante atu haree se kandidatu sira kumpre rekizitus molok tama ba etapa tuir mai,” Komisaun Rekrutamentu Vaga Kandidatu Estudante Akademia Militár Konjunta 2026, Nuno Manuel Corvêlo de Andrade ba jornalista sira, hafoin observa direta kandidu estudante akademia militár konjunta tinan 2026 iha Fakuldade Enjeneria Siénsia Teknolojia, Hera, Kuarta (06/05/2026).
Nia esplika, iha prova kulturál no kandidatu sira hafoin liu faze nee, kandidatu sira tuir teste materia tolu hanesan Matematika, Portuges no Ingles.
“Prova ida nee sei determina se mak bele kontinua ba etapa tuir mai. Komisaun mos define kriteria klaru konaba altura no idade atu garante kandidatu sira iha kondisaun atu tuir treinamentu. Ba mane altura la bele menus husi 1.64 metru no ba feto 1.60 metru,” nia informa.
Nia hatutan, ba kandidatu estudante akademia militar konjuntu nee tenke idade husi 17 too 20 no iha fulan dezembru agora mak atinji ona tinan 21 nee labele ona.
“Tanba ami tenke haree sira nia idade produtivu atu bele dezenvolve sira nia kareira militár,” katak nia.
Nuno Corvelo hateten, iha prosesu ida nee komisaun mos identifika katak barak kandidatu la liu tanba problema dokumentus.
“Maioria kandidatu sira la aprezenta dokumentus konprovativu konaba sira nia formasaun edukasaun ba decimo segundu ano, tanba nee mak barak los la liu,” nia koalia.
Maske nunes nia dehan,ekomisaun sei kontinua ho faze selasaun tuir mai, no kandidatu sira neebe liu hotu prosesu sei hetan oportunidade atu tama no tuir estudu iha Akadémia Militár.
“Prosesu ida nee hanesan ha’u dehan ona rigor no laiha famíliarizmu, prosesu selesaun ida nee la haree nia nee jeneral ka ofisial no veteranu nia oan, tanba ami komisaun iha komprimisiu atu lori prosesu nee too ho transparante,” nia deklara.
Nuno Corvelo informa prosesu selesaun nee lao ho rigór no transparante.
“Agora faze prova kultural, kuandu iha nee mak sira laliu sira sei elemina hodi labele hakat ba faze tuir mai.No faze tuir mai barak hatoo katak kandidatu sira neebe pasa iha prova kultural sei pasa ba teste mediku no fiziku, no too loron sanulu sira ba iha akademia militar iha Aileu. Tanba ita sei iha selebrasaun ema ema nain 60 iha faze dahuluk akademia militár konjunta”, nia hatutan.
Iha fatin hanesan, kandidata estudante akademia militár konjunta 2026, Devia de Jesus Amaral sente kontente tanba bele konkore vaga akademia militar konjuntar no iha esperansa hakarak sai duni militar.
“Hau husi Munisípiu Aileu, hau nia esperansa mak nee sente kontente bele konkore akademia militar ida nee no ba oin mak liu hakarak kaer sai militár hodi defende no ita nia rai, sai militar nee mehi dezde uluk kiik kedas,” nia dehan.
Nunee mos Samuel Nilton Soares informa, sente kontente bele iha akademia militár konjuta.
“Hau nia esperansa mak nee lakon ka manan laos kestaun, maibe buat neebe motiva mak nee nudar Timor oan tenke kontribui ba itania rai,” nia afirma.
(jen)
