DILI, STLTIMORLESTE.com – Kandidatu Embaixador Estadu Unidos Amerika ba Timor Leste halao enkontru ho Prezidente Republika, Jose Ramos Horta, hodi diskute hamutuk oinsa promove relasaun amizade entre Timor Leste ho Amerika.
Bainhira remata hasoru malu, Kandidatu Embaixador USA Ba Timor Leste, Mark L Garber ba jornalista iha palasiu Prezidensial Nicolau Lobato, Bairo Pite, Segunda (25/05/2026) hatete, ohin halao enkontru ho Prezidente Republika Jose Ramos Horta hakarak atu hametin relasaun neebe diak entre nasaun rua iha futuru.
“Hau nia ajenda enkontru ho Prezidente ohin mak hau hakarak halo relasaun neebe diak entre estadu Timor no estadu Unidos Amerika, no hau mak kandidatu atu sai embaixador Estadu Unidos Amerika mai Timor Leste maibe hau sei hein hetan nomeiasaun husi Prezidente Trump,” dehan
Kandidatu Embaixador hatete iha momentu neebe nia mai vizita Timor no hakarak mai vizita Prezidente Republika Timor Leste, Jose Ramos Horta, atu aprezenta proposta balun konaba relasaun entre nasaun rua nee.
“Ami iha konversa neebe diak tebes hodi ami bele halo diskusaun isu neebe mak diferente neebe mak bele ajuda hodi promove relasaun nee sai diak liu tan,” katak nia.
Kandidatu Embaixador USA ba Timor Leste nee hatutan tan katak, sente haksolok tebes hodi halo enkontru ho Prezidente Republika Timor Leste.
“Buat ida hau halo diskusaun ho Prezidente mak hau hanesan embaixador hakarak buat neebe atui fasil liu mak ajuda Timor fasil liu hetan visa hodi bele halo viajen ba estadu Unidos, nunee Timor atu bele hetan visa mak tenke halo viajen ba Iha Jakarta hodi bele aplika iha neeba,” katak nia.
Hanesan embaixador hakarak muda ninia administrasaun ida nee hafasil liu halo iha visa interviu iha embaixada iha Dili, objetivu ida nee halo fasil liu timor oan bele vizita Estadu Unidos Amerika.
Nia hatutan, iha hasoru malu nee halo mos diskusaun oituan konaba oinsa lori investor sira mai hodi bele dezenvolve nasaun Timor Leste.
“Hau fiar katak Timor nee bele sai fatin Gudang hodi suplay mos aihan ba ASIA tengara, tanba nee hau mos intrese atu bele dezenvolve agrikultura iha Timor, ida nee mos hau aprezenta ba Prezidente,” katak nia.
Planu husi kandidatu Embaixador bainhira mak implementa hatan ba kestaun nee Kandidatu Embaixador USA ba TL hatete dadaun nee sei hein bainhira Prezidente Amerika nomeia ona foin bele implementa planu no programa sira nee.
Iha biban nee Prezidente Republika Jose Ramos Horta hatoo benvindu ba Kandidatu Embaixador USA Ba Timor Leste, Mark L Garber neebe hakat mai iha palasiu Prezidensial hodi koalia konaba oinsa hametin lasu amizade rai rua iha futuru.
(eme)
