ERMERA, STLTIMORLESTE.com — Kandidatu Polísia Nasional Timor-Leste (PNTL) hato’o keixa ba Provedoria Direitus Umanus no Justisa (PDHJ) kona-ba dokumentus lakon no la admitidu iha teste foun.
Kandidatu sira ba rekrutamentu Polísia Nasionál Timor-Leste (PNTL) hato’o keixa ba Provedoria Direitus Umanus no Justisa (PDHJ), tanba dokumentus sira alegadamente lakon.
Provedor Direitus Umanus no Justisa, Virgílio da Silva Guterres, dehan kandidatu sira uluk admitidu, maibé iha reverifikasaun foun la admitidu tanba dokumentus la hetan.
“Kandidatu sira uluk admitidu, maibé iha teste foun la admitidu tanba dokumentus lakon. Tanba ne’e, sira hato’o keixa,” dehan Virgílio ba STL, Kinta-feira, 24 Setembru 2026.
Virgílio dehan, PDHJ sei halo averiguasaun no verifikasaun atu determina faktu kona-ba alegasaun dokumentus lakon ne’ebé kandidatu sira hato’o.
Nia hateten, presiza klarifika se kandidatu sira la entrega dokumentus, ka entrega ona maibé dokumentus lakon iha prosesu administrativu.
“Se kandidatu entrega ona dokumentus, maibé komisaun halo lakon, tenke fó justifikasaun. Labele dehan de’it dokumentus lakon,” dehan nia.
Virgílio esplika, PDHJ sei verifika dokumentus no prosesu administrativu atu haree se alegasaun kandidatu sira iha baze ka lae.
Keixa ne’e hato’o iha Kuarta-feira, 23 Setembru 2026. Kandidatu 16, hamutuk ho sira-nia porta-voz, lori keixa ba PDHJ.
Tuir Provedor, kandidatu sira alegadamente entrega dokumentus kompletu, maibé iha prosesu foun dokumentus refere la hetan bainhira sira atu kontinua ba teste fíziku.
Virgílio mos refere ba prosesu rekrutamentu anterior no desizaun Tribunal Rekursu (TR), ne’ebé konsidera nu’udar referénsia ba prosesu rekrutamentu
(ter)
