BAUKAU, STLTIMORLESTE.com – Hafoin transporte publiku ida no privadu ida tuir estrada diresaun husi Baguia Vila ba Suku Haekoni, Ossohuna no Afaloikai, Postu Administrativu Baguia monu no halis, tanba estrada refere kondisaun aat, nunee komunidade sira inisiativa taka ona estrada kuak sira.
Xefe Suku Ossohuna, Paulo dos Reis Piedade aprezenta, kondisaun estrada husi Baguia Vila ba too Suku Afaloikai diresaun liu husi Suku Ossohuna ho distansia kilometru 10 resin iha neebe kada tinan tempu udan difikulta movimentasaun komunidade sira ho transporte publiku no privadu, iha neebe semana dahuluk fulan Maiu nee rezulta tranporte publiku bis pulsa tula pasajeiru diresaun husi Baukau Vila atu ba Suku Ossohuna halis iha area Ribalai inklui tranporte privadu trek ida monu iha loron no fatin hanesan, tanba rai kois no kondisaun estrada aat, maibe la rezulta sidadaun utilizador no pasajeiru sira kanek.
“Estrada aat halo kareta monu, entaun komunidade sira ho kareta nain sira ho voluntariamente hadia estrada,” Xefe Suku Ossohuna, Paulo dos Reis Piedade hateten ba jornalista sira iha Vila Antiga Baukau, Kinta (07/05/2026).
Nia sublina, husi inisiativa komunidade sira nian taka estrada kuak nee, hahu iha fatin risku sira husi Suku Haekoni too Afaloikai, neebe ho objetivu atu fasilita transporte publiku sira mantein too iha baze hodi tula sai produtu lokal sira ba merkadu.
Nia fundamenta, kondisaun estrada refere Autoridade Suku ho proposta konjunta liu husi Autoridade Postu Baguia diriji ona ba Ministeriu Obras Publikas (MOP) atu halo manutensaun no reabilitasaun, maibe seidauk iha resposta.
“Hakarak rekomenda ba Obras Publikas tau matan lalais ba estrada nee, tanba estrada nee grave liu tiha ona,” Paulo rekomenda.
Iha sorin seluk, Sekretariu Ezekutivu Partidu FRETILIN Munisipiu Baukau, Gabriel Piedade Fraga mos husu Governu Sentral atu tau matan ba estrada husi Baguai Vila too Suku Afaloikai, nunee bele fasilita movimentasaun komunidade sira ho transporte publiku no privadu, tanba kondisaun estrada refere grave.
“Hau hanoin Governu tenke seriu implementa no haree ba kondisaun estrada nee, tanba estrada nee asesu ba movimentasaun publiku nunee produtu lokal sira mai merkadu,” Gabriel komenta.
Liga asuntu nee STL tenta konfirma Koordenador Tekniku Destakadu Obras Publikas Munisipiu Baukau, maibe laiha fatin atu fo komentariu.
(tom)
