DILI, STLTIMORLESTE.com – Tribunal absolve kazu sosa roo rua iha Ministeriu Edukasaun, tanba konsidera la provadu ba iha krimi neebe Ministeriu Publiku akuza ba arguidu sira.
Arguidu hamutuk nain 7 ho inisial DC, MCA, MM, AC, PARM, AFXR no CL.
“Prosesu nee Tribunal absolve arguidu sira tuir pedidu Ministeriu Publiku nian, tanba iha alegasaun Prokurador rasik husu ba iha Tribunal atu absolve arguidu sira,” dehan Defeza Arguidu sira nian, Fernando de Carvalho ba jornalista STL iha Kaikoli, Kinta (15/05/2025).
Nia hatutan, aseita ho desizaun neebe Tribunal aplika, tanba Ministeriu Publiku rasik mak husu iha alegasaun atu absolve arguidu sira.
Antes nee iha alegasaun, Ministeriu Publiku liu husi Prokurador Domingos Gouveia, solisita ba iha Tribunal Koletivu atu absolve arguidu sira.
Iha alegasaun nee Prokurador Domingos Gouveia deklara katak, husu ba iha Tribunal Koletivu atu absolve arguidu sira, maibe husu Tribunal atu haree mos ba iha erru administrativu neebe arguidu sira komete.
Aleinde nee Defensor Publiku, Fernando da Costa iha nia alegasaun deklara katak, aseita ho pedidu Ministeriu Publiku kona-ba absolvisaun. Maibe defeza konsidera, arguidu sira la pratika erru administrativu, tanba nee husu Tribunal atu absolve total arguidu sira husi krimi neebe akuza ba, atu labele prejudika fali arguidu sira nia pozisaun iha futuru.
Audensia julgamentu nee prezide husi Juiz Koletivu Jose Escurial, Fransisca Cabral no Afonso Carmona, Ministeriu Publiku reprezenta husi Prokurador Domingos Gouveia, Arguidu sira hetan asistensia legal husi Defensor Publiku.
(ter)
