DILI, STLTIMORLESTE.com – Tribunal Judisial Primeira Instansia Dili (TJPID) kontinua halao julgamentu ba kazu hamate vitima Nuno Dos Santos Pereira, no estragus lezadu AR nia sasan uma.
Prosesu ida nee iha arguidu hamutuk nain 11, ho inisial hanesan EM, DS, ASdA, MMdRM, TdJB, LH, GVX, JdCdS, AMdCP, AS no ZAdJX.
Prosesu refere, antes nee Tribunal rona ona deklarasaun husi arguidu sira, tanba nee iha julgamentu kotinuasaun nee, Tribunal kontinua rona deklarasaun husi lezadu AR.
Iha sala julgamentu laran lezadu AR deklara katak, nia konese deit maka arguidu Marito no Abay, maibe Abya oras nee dadaun iha ona Inglatera.
Lezadu deklara katak, momentu neeba lezadu ba partesipa iha aniversariu matebian Nuno Dos Santos Pereira, depois iha kalan matebian tula lezadu fila ba iha lezadu nia uma.
Lezadu esplika, lezadu ho matebian ho motor liu husi estrada, arguidu Marito no Abay ho motor tuir kedan husi sira nia kotuk, to iha lezadu sira nia uma arguidu nain rua husu ba lezadu katak, se maka ohin hakilar dehan Mat7, no lezadu ho matebian hatan ba arguidu nain rua katak, ami la hakilar ida.
Lezadu deklara tan, husu hotu tiha arguidu nain rua lao sae leten, derepente hanesan nee arguidu nain rua hamutuk ho ema barak mai hodi hakilar.
Lezadu esplika, momentu neeba iha ema barak no kalan tanba nee lezadu la konsege indentifika ema sira nee hotu, maibe lezadu hatene deit maka arguidu Marito no Abay.
Rona tiha deklarasaun lezadu nian, Tribunal adia ba loron seluk hodi kontinua rona deklarasaun husi lezadu.
Iha indisus sufisiente katak, iha loron 23 fulan Novembru tinan 2016, haleu oras tuku 16h OTL, lezadu AR ho nia kolega sira han hamutuk hodi selebra matebian Nuno dos Santos Pereira nia aniversariu iha Pantai kelapa, suku comoro, Posto Administraivo Dom Aleixo, Munsipiu Dili
Iha oras tuku 17h OTL vitima Nuno dos Santos dehan ba lezadu katak “hau tula hela ita ba” entaun lezadu mos hatan, wainhira too iha lezadu nia uma iha Bebonuk, la kleur arguidu EM, no arguidu MMdRM, hamutuk ho nia kolega sira ba iha lezadu nia uma, iha neeba arguidu nain rua ho nia kolega ida seluk mak ba husu vitima dehan “se mak ohin hakilar, nunee vitima Nuno hatan, ami la hakilar ida, ami mos foin mai”, hafoin vitima hatan hanesan nee, arguidu nain tolu mos atu fila.
Maibe derepente arguidu nain sia mosu mai, sira hotu tau forsa hamutuk hodi asaltu vitima ho lezadu no lori fatuk hodi tuda lisuk lezadu AR nia uma, resulta vidru janela sira nian rahun hotu.
Tanba arguidu sira barak hodi tuda lisuk vitima no lezadu ho ameasa no violelensia, halo lezadu ho nia kolega sira difisial atu defende an, sira halai subar hotu iha kuartu laran, tanba sente tauk no difisil atu halo resistensia hodi hasoru arguidu sira.
Maibe lezadu AR sei subar hela iha kuartu ida seluk, mak haree arguidu EM halai ba dudu vitima Nuno nia motor neebe para hela iha varanda, entaun vitima hakilar dehan “nusa mak dudu fali hau nia motor,” wainhira vitima dehan hanesan nee, arguidu MMdRM hasai rama ambon hodi tiru vitima no kona kedas iha vitima nia hirus matan.
Hafoin tiru tiha, arguidu MMdRM kontinua lori fatuk hodi tuda kona iha vitima Nuno nia ulun, mak halo vitima monu kedas iha fatin.
Katak arguidu EM ba dudu vitima nia motor para hodi muda vitima nia fokus, nunee arguidu MMdRM aproveita hodi tiru no tuda rezulta vitima mate.
Lezadu ho nia kolega sira transporta vitima ba iha Hospital, maibe iha dalan vitima nia is kotu, vitima mate kausa husi anemia aguda, tanba hetan tiru ho rama ambon husi arguidu MMdRM.
Katak arguidu MMdRM tiru vitima hamrik ho distansia metru tolu hanesan nee, tanba lezadu AR hamrik subar hela iha kuartu ida seluk no lezadu hare ho matan wainhira arguidu MMdRM tiru no tuda vitima Nuno.
Lezadu AR haree mos no konese, tanba iha tempu neeba arguidu MMdRM hatais kalsa badak ida, tara pasta mean kiik ida hodi tau rama ambon, faru mak lezadu ladun haree nia koor, tanba rai nakaras ona, wainhira arguidu MMdRM tiru vitima, lezadu hase kedas dehan “Abai hau konese o, o atu halai ba neebe.
Lezadu AR nia uma no sasan uma laran rahun no la aproveita hotu kedas, no hahu husi neeba lezadu ho nia familia la ba hela iha sıra nia fatin too agora, sasan uma laran neebe arguidu sira estraga nee nia valor osan liu US$ 3000.
Wainhira arguidu sira tuda uma lezadu nia fen ho nia oan sıra halai tiha ba vizinhu nia uma, vitima ho lezadu no nia kolega seluk hamutuk nain 6 mak hela, maibe tanba tauk entaun sira subar iha kuartu laran, nunee lezadu ho vitima mesak mak haree arguidu sira nia asaun no hare vitima lakon nia vida.
Konsekuensia husi arguidu sira nia konduta nee, rezulta vitima Nuno dos Santos Pereira lakon nia vida no rezulta mos lezadu AR nia uma no sasan uma laran inklui motorizada ida hetan estragus total neebe fo prejuizo patrimonial ba lezadu ho valor US$ 300.
Tanba nee konstitui arguidu nain sanulu resin ida, nudar ko-autor material ba konkursu krime ho forma konsumadu, pratika krime ida (1) Homesidu Simples, no krime ida Danu ho Violensia previstu no punidu iha artigu 138 no artigu 260 husi kodigu Penal.
Audensia julgamentu nee, prezide husi Juiz Kolektivu, Jose Gonsalves, Jose Quintao, Jumiati Freitas, Ministeriu Publiku reprezenta husi Prokurador Nelson Magno, arguidu sira hetan asistensia legal husi Defensor Publiku Fernando de Carvalho.
(ter)
