DILI, STLTIMORLESTE.com – Tribunal Judisial Primeira Instansia Dili (TJPID) kontinua halao julgamentu kona-ba kazu kafe tonelada rua (2) lakon, neebe envolve husi arguidu nain tolu (3) ho inisial, LT, EdSP no JS.
Prosesu nee vitima mak empreza KTON, Tribunal rona ona arguidu no sasin sira nia deklarasaun, inklui faze alegasaun hotu ona. Tanba nee atu tama ba iha leitura akordaun, Tribunal halo alterasaun substansial ba faktus foun.
Iha sala julgamentu laran, Juiz Prosesu Ersilia de Jesus deklara katak, prosesu nee atu tama ba iha leitura akordaun, maibe Tribunal sei halo alterasaun substansia ba faktus foun.
Juiza prosesu deklara, alterasaun ba faktus foun mak konaba presu neebe faan normal no presu neebe arguidu sira faan ba ema seluk.
Kona-ba alterasaun substansia ba faktus foun nee Ministeriu Publiku (MP) neebe reprezenta husi Prokurador Ricardo Leite no mos husi parte defeza nian, Advogadu Privadu Amarico la iha pozisaun.
Ho nunee, Tribunal deside adia prosesu nee ba iha loron seluk, hodi rona leitura akordaun.
Iha indisus sufisiente katak, iha loron 18 Janeiru 2025, tuku 13:30, testemunha sira Vitor Manuel Carvalho no Jaquel Madeira da Cruz haree arguidu sira karrega kafe hamutuk tonelada rua (2) ka kilograma 950 ba kareta kamiaun ida ho kor kinur.
Tuir mai, arguidu sira lori kafe nee ba Dili ho objetivu atu faan ba ema ida naran Mateus iha Becora, ho valor osan hamutuk US$ 4.000.
Hahalok nee hamosu prejuizu ba empreza KTON.
Arguidu nain tolu sira nia hahalok nee ho vontade rasik no ho intensaun atu realiza krime nee hamutuk. Sira uza relasaun konfiansa espesial neebe iha entre sira no empreza, tanba sira mak trabalhador iha empreza refere. Sira foti no lori kafe tonelada rua neebe laos sira nia propriedade legitima.
Arguidu sira hatene katak hahalok nee bandu husi lei no bele hetan kastigu kriminal.
Nunee arguidu nain tolu komete krime Furtu Agravadu hanesan autor material previstu no punidu tuir Artigu 252 husi Kodigu Penal.
Audensia julgamentu nee prezide husi Juiz Kolektivu, Ersilia de Jesus, Jose Maria, Ana Paula, Ministeriu Publiku reprezenta husi Prokurador Ricardo Leite, arguidu sira hetan asistensia legal husi Advogadu Privadu Americo.
(ter)
