DILI, STLTIMORLESTE.com – Ministériu Saúde hametin kuidadu saúde inan no oan liuhosi programa KEmON, ho objetivu hamenus mortalidade inan, bebé no labarik tinan 5.
Visi-Ministru Saúde ba Asuntu Operasionalizasaun no Ospitál, Flavio Brandao Mendes de Araujo hatete, programa KEmON presiza optimizasaun atu aumenta kualidade asisténsia.
“Ohin ita halo workshop atu avalia fali fasilidade no nia funsionamentu, inklui estratéjia no teknolojia atu haforsa rede asisténsia KEmON,” dehan nia ba jornalista depois abertura workshop optimizasaun rede ni avaliasaun fasilidade KEmON niha Suai Room, Timor Plaza, Tersa (06/10/2026).
Nia hatete, workshop ne’e fó atensaun ba prevensaun no asisténsia saúde inan no oan, hahú molok isin-rua, durante isin-rua no depois partu.
Flavio salienta, kualidade asisténsia sai prioridade, la’ós de’it kuantidade servisu ne’ebé oferese ba komunidade liuhosi fasilidade saúde sira.
Workshop kona-ba optimizasaun rede KEmON hala’o Ministériu Saúde hamutuk ho parseria Nasaun Unidas, UNFPA, no apoiu husi nasaun parseiru sira.
Parseiru sira inklui Governu Japaun, Austrália liuhosi DFAT, Tailándia, Malásia no reprezentasaun diplomátika seluk.
Reprezentante UNFPA no Koordenadór Rezidente ONU iha Timor-Leste, Funmi Balogun, hatete apoiu UNFPA fó prioridade ba saúde inan no oan.
Nia hatete, apoiu ne’e ho objetivu prevene mate inan no oan, no asegura asesu ba asisténsia emerjénsia obstétrika no kuidadu bebé foin moris.
“ONU la’ós doadór, maibé fó asisténsia téknika liuhosi peritu sira atu fahe koñesimentu no hadi’a kualidade servisu,” dehan Funmi.
Workshop ne’e realiza iha Suai Room, Timor Plaza, Dili, tersa-feira (06/10/2026), ho partisipasaun instituisaun relevante sira.
(dom)
