DILI, STLTIMORLESTE.com – Komisaun Funsaun Publiku (KFP) hamutuk ho Visi Primeiru Ministru, Ministru Dezenvolvimentu Rurál no Habitasaun Komunitária (MDRHK), Mariano Assanami Sabino fo tomada de pose ba funsionariu nain 18 neebe kaer kargu xefia iha Instutisaun Nasionál de Combate Ao HIV-SIDA, I.P.
“Ita hotu orglhu tanba pasu importante ida ba Instutisaun Nasionál de Combate Ao HIV-SIDA, I.P. atu bele funsiona nuudar Instituisaun Publiku neebe halao misaun importante tebes-tebes, tanba nee parabens ba imi nain 18 neebe ohin simu ona toma de pose,” hateteVisi Primeiru Ministru, Ministru Dezenvolvimentu Rurál no Habitasaun Komunitária (MDRHK), Mariano Assanami Sabino ba jornalista sira liu husi nia deskursu iha salaun Instutisaun Nasionál de Combate Ao HIV-SIDA, I.P iha Pantai Kelapa Dili, kinta nee (05/06/2025).
Nia dehan, Instituisaun Nasionál de Combate Ao HIV-SIDA, I.P ida nee espesífiku, misaun importante tebes-tebes atu halo sosializasaun para moras ida nee labele hadaet tan ba seluk no hamenus numeru HIV-SIDA iha Timor Leste (TL).
Nia tenik, sira neebe moras mos labele sente iha kotuk, maibe sira nafatin iha oin no nafatin sidadaun, nomos sidadaun ida neebe nafatin fo kontribuisaun ba rai ida nee.
“Dala ruma moras nee hadaet ba ema mos ita la hatene, tenke teste mak foin hetan, no ema barak lakohi halo teste, tanba tauk, mais mate iha Maromak nia liman, tanba mate iha ninia dalan rasik, ita so esforsu para kuidadu ita nian aan, kuidadu ita nia moris, depois ho vida neebe naruk, tanba nee ita hotu sei moris, tenke halo buat ruma ba ita rain nuudar kriatura Maromak nian,” nia informa.
Nia hatutan, nain 18 neebe ohin simu ona kargu atu implementa no realiza didiak, no servisu ho fuan ho laran, didika servisu ba rain ida nee.
“Hau dehan ba funsionariu hotu-hotu, imi nia pilihan mai iha Estadu para servi, atu servi ba ema hotu-hotu, hanesan partidu polítiku sira hanesan ponte ida, maibe Estadu ba povu tomak nomos estadu laiha diskriminasaun ba ema ida,” nia deklara.
Iha fatin hanesan, Diretór Jerál iha Institutu Nasionál Administrasaun Públika (INAP), José Telo Soares Cristovão esplika, lori Komisaun Funsaun Publiku nia naran hatoo parabens no iha serimonia toma de pose iha dirijenti foun iha Instituisaun Nasionál de Combate Ao HIV-SIDA, I.P.
“Hau hanoin ba Instituisaun de Combate Ao HIV-SIDA, I.P liu husi prosesu ida, ita ba konkulzaun ida no ohin ba toma de pose ida nee, instituisaun ida nee mai ho responsabilidade boot, ita boot sira ohin simu knaar no halo ona juramentu, tanba nee imi nia responsabilidade atu fo sosializasaun ba ema hodi prevene moras HIV-SIDA nee,” nia deklara.
Nia koalia, responsabilidade ba nain funsionariu tomak iha instituisaun ida nee, “Imi nia responsabilidade laos deit ba instituisaun ida nee, maibe mos responsabilidade mos ba ema moras HIV-SIDA, sai mediator, ajuda mos sosializa informasaun para ema bele halo prevensaun ba moras nee,” nia informa.
Nunee mos Prezidente Institutu Nasionál Kombate HIV-SIDA, Daniel Marçal deklara, liafuan nee fo hanoin husi matebian Saudozu Fernando Lasama hatete katak, “hau nia dignidade la aas liu nasaun nian dignidade”, tanba nee hadomi ema seluk hanesan ita nia aan rasik, tanba uza kargu neebe Estadu fo nee hodi halo netik buat ruma ba servi ema seluk liu husi Estadu ida nee.
“Hau fo liafuan barak ba Kargu Xefia sira neebe ohin simu toma de pose, ita sai azente estadu ida, sai nain ulun ba instituisaun ida nee, signifika ita tenke tau prioridade makaas liu ba ita nia kargu neebe fo mai ita, hadomi liu ita nia servisu neebe Estadu fo fiar mai ita,” nia afirma.
(jen)
