DILI, STLTIMORLESTE.com – Iha loron Kuarta, Konselhu Ministrus (KM) halao sorumutu iha Palasiu Governu, lidera husi Primeiru Ministru, Kay Rala Xanana Gusmão konsege aprova projetu Dekretu Lei ida, aprezenta husi Ministru Justisa (MJ), Sergio de Jesus Fernandes da Costa Hornai, husu atu halo alterasaun dahuluk ba Dekretu-Lei numeru 10/2012, loron 29 fulan Fevereiru, konsege aprova Karreira Espesial no Estatutu Guarda Prizional nian.
Tuir Ministru Justisa, Sergio de Jesus Fernandes da Costa Hornai ba jornalista sira iha Palasiu Governu, Kuarta (01/07/2026) katak, diploma ida nee atu halo revizaun ba rejime Karreira Espesial no Estatutu Guarda Prizional, neebe vigora iha tinan 2012 ho objetivu atu esklarese regras ba promosaun karreira, valoriza guarda prizional no reforsa efikasia sistema prizional nian.
Nia dehan, iha dekretu lei foun nee, mudansa prinsipal sira neebe prevee iha diploma ida nee maka kria kategoria Xefe Guarda Prizional Prinsipal, revee regras promosaun, aumenta komplementu remuneratoriu ba 50% husi salariu baze, fo direitu ba refeisaun durante turnu servisu no kria rejime promosaun exesional bazeia ba antiguidade ba guarda prizional sira neebe mantein iha eskalaun ikus husi sira nia kategoria durante tinan 8 liu, naran katak sira kumpre rekizitu legal sira.
“Ita nia Diploma nee mos introdus ajustamentu ba rekrutamentu, formasaun no ezersisiu funsaun xefia nian, tanba nee, revizaun ida nee nia objetivu mak atu rekonhese meritu no dedikasaun guarda prizional sira nian, kria kondisaun diak liutan ba progresaun sira nia karreira no kontribui ba hadia seguransa no kualidade servisu neebe presta iha estabelesimentu prizional sira,” dehan nia.
Nia afirma, Projetu Dekretu Lei ida nee hetan ona deliberasaun iha sorumutu KM iha loron 13 fulan Marsu tinan 2024, mais tuir ajustamentu sira neebe mak introdus iha faze redasaun final, liu-liu atu armoniza rejime remuneratoriu, prevee direitu ba refeisaun durante turnu servisu no estabelese rejime tranzitoriu ida ba promosaun estraordinaria, presiza reavaliasaun no deliberasaun foun ba Projetu Dekretu Lei ida nee.
Iha enkontru KM nee mos, Visi Ministra Negosius Estranjeirus no Kooperasaun, Jesuina Maria Ferreira Gomes, aprezenta ba KM kona ba programa vizita ofisial Primeiru-Ministru no Ministru Finansas Republika Singapura nian iha Timor Leste, Lawrence Wong, neebe sei halao iha loron 2 no 3 fulan Julhu tinan 2026.
Iha vizita nee, sei halao enkontru ho Prezidente Republika no Primeiru Ministru nuudar reuniaun Bilateral entre delegasaun sira nasaun rua nian, konferensia imprensa konjunta ida no almosu ofisial ida neebe oferese husi Primeiru Ministru, Kay Rala Xanana Gusmão.
Vizita nee inklui mos kondekorasaun Orden Timor Leste husi Prezidente Republika ba Primeiru Ministru Singapura, hodi rekonhese ninia kontribuisaun ba hametin relasaun amizade no kooperasaun entre nasaun rua nee.
(jos)
