DILI, STLTIMORLESTE.com – Konselhu Ministrus (KM) halao sorumutu iha Palasiu Governu, Dili, no aprova ona projetu rezolusaun Governu, neebe aprezenta husi Visi Primeiru Ministru, Ministru Koordenador Asuntus Ekonomikus no Ministru Turizmu no Ambiente, Francisco Kalbuadi Lay, kona-ba Kriasaun Komisaun Interministerial ba Akompanhamentu Projetu Konstrusaun Sentru Konvensaun Internasional (SKI). Nunee halo alterasaun dahuluk ba dekretu lei Numeru 48/2023 loron 23 Agostu kona-ba Organika Ministeriu Negosius Estranjeirus no Kooperasaun (MNEC) nian.
Tuir informasaun neebe STL asesu husi Gabinete Konselhu Ministru, Kuarta nee (15/04/2026) iha Palasiu Governu katak, rezolusaun Governu ida nee, kria mekanizmu koordenasaun interministerial ida, atu garante akompanhamentu kontinua ba projetu konstrusaun Sentru Konvensaun Internasional, neebe rekonhese nuudar inisiativa estruturante ba dezenvolvimentu ekonomiku, promosaun turizmu no hasae kualidade sidade Dili nian.
Rezolusaun nee estabelese konstituisaun komisaun ida neebe ho natureza teknika no konsultiva, neebe organiza iha grupu trabalhu rua. Grupu trabalhu ida, asume funsaun sira dezenvolvimentu projetu nian ho responsabilidade ba akompanhamentu tekniku ba obra, kontrolu kualidade no verifikasaun ba espesifikasaun konstrusaun nian, enkuantu grupu trabalhu ida seluk, asegura koordenasaun interministerial iha nivel supervizaun nian ho partisipasaun husi reprezentantes husi ministeriu oi-oin no entidade publika relevante sira.
Entre funsaun prinsipal sira neebe atribui ba komisaun ida nee, maka akompanhamentu ba faze oi-oin projetu nian, koordenasaun entre entidade sira neebe envolve, monitorizasaun ba prazu, kustu no risku finanseiru inklui mos identifikasaun ba limitasaun ruma no proposta medidas korretivas.
Prevee mos elaborasaun relatoriu periodiku no halao sorumutu regular hodi avalia progresu obra nee.
Koordenasaun jeral ba komisaun nee, responsabilidade husi Visi Primeiru Ministru ho apoiu tekniku, administrativu no lojistiku neebe fornese husi ninia gabinete, atu nunee bele garante efikasia husi akompanhamentu no koerensia iha ezekusaun projetu estratejiku ida nee.
Alterasaun Dahuluk Dekretu Lei numeru 48/2023 MNEC
Iha biban enkontru nee, Konselhu Ministrus aprova mos Projetu Dekretu Lei, neebe aprezenta husi Ministru Negosius Estranjeirus no Kooperasaun, Bendito dos Santos Freitas, kona ba alterasaun dahuluk ba Dekretu Lei numeru 48/2023, loron 23 fulan Agostu, kona ba Organika Ministeriu Negosius Estranjeirus no Kooperasaun (MNEC) nian.
Alterasaun ida nee, ho objetivu atu armoniza organika Ministeriu nian ho alterasaun daruak ba kompozisaun Governu Konstitusional IX nian, neebe vigora ona, neebe inklui kargu Vise Ministra Negosius Estranjeirus no Kooperasaun nian.
Diploma nee mos estabelese katak, Sekretariu Jeral MNEC neebe responsavel hodi jere, koordena no superviziona apoiu tekniku administrativu no finanseiru ba servisu hotu-hotu Ministeriu nian, hetan nomeasaun husi Ministru Negosius Estranjeirus no Kooperasaun entre funsionariu diplomatiku sira ho kategoria embaixador ka nuudar alternativa, konselheiru ho esperiensia profisional no diplomatika neebe relevante iha servisu sentral no periferiku esternu ministeriu nian.
(jos)
