DILI, STLTIMORLESTE.com – Konselhu Ministru (KM) halao reuniaun extraordinaria iha Auditóriu Kay Rala Xanana Gusmão, iha Ministeriu Finansas, aprova votu de pesar ida no deside atu dekreta lutu nasional, tanba matebian Francisco Guterres “Lu Olo” eis Prezidente Republika Demokratika Timor Leste no Prezidente Frente Revolusionaria Timor Leste Independente (FRETILIN).
“Lutu nasional nee sei observa iha territoriu nasional tomak durante loron 7, hahu husi tuku 15:00 iha loron 22 Junhu too tuku 24:00 iha loron 28 Junhu, ho bandeira nasional hasae iha meia-adrisa iha edifisiu publiku hotu-hotu, inklui embaixada, konsuladu no reprezentasaun Estadu nian iha rai-liur, no mos iha embarkasaun Estadu nian,” haktuir nota komunikadu imprensa neebe STL asesu husi Governu, Segunda (22/06/2026).
Francisco Guterres “Lu- Olo” mate iha tinan 71, iha Hospital Prince Court, iha Kuala Lumpur, Malázia, neebe nia hela hela atu simu tratamentu mediku intensivu.
Nia moris iha Ossu, Munisipiu Viqueque, iha loron 7 Setembru 1954, no dedika parte boot husi nia moris ba luta libertasaun nasional, ho kaer responsabilidade oioin iha rezistensia durante okupasaun indonezia. Depois mate Konis Santana iha tinan 1998, nia simu lideransa polítika rezistensia timoroan nian.
Iha tinan 2001, nia hili nuudar Prezidente Asambleia Konstituinte, orgaun neebe responsável atu elabora Konstituisaun Repúblika nian. Nia halao knaar nuudar Prezidente Parlamentu Nasional entre 2002 no 2007, no iha tinan 2017 nia hili nuudar Prezidente Repúblika, kargu neebe nia kaer too tinan 2022.
Francisco Guterres “Lu Olo” hetan distinsaun Kolar Orde Timor-Leste iha tinan 2009, Grande-Kolar Orde Timor-Leste iha tinan 2022, no Grande-Kolar Orde do Infante D. Henrique, neebe Republika Portugesa fo iha tinan hanesan, atu rekonese nia kontribuisaun ba Timor-Leste no ba fortalese relasaun entre nasaun rua nee.
“Ho deliberasaun ida nee, Governu fo omenajen ba membru ida neebe destaka iha luta libertasaun nasional no hatoo kondolensia klean ba nia esposa, oan sira no família tomak, ba FRETILIN no povu timoroan tomak, ho rekonese legadu dedikasaun no servisu neebe Francisco Guterres “Lu Olo” husik ba konstrusaun Timor-Leste ida livre, demokratiku no soberanu,” hakotu.
(alb)
