DILI, STLTIMORLESTE.com – Governu liu husi reuniaun Konselhu Ministru (KM) iha Palasiu Governu, Kuarta (04/06) aprova ona proposta Federasaun Futebol Timor Leste (FFTL) nian, neebe atu halo reabilitasaun ba Estadiu Munisipal Dili no halo tan konstrusaun foun ba Estadiu ho kampu futsal indoor padraun internasional iha Tasi-Tolu, Dili.
Tuir nota komunikadu neebe STL asesu husi pajina ofisial FFTL iha Kuarta (04/06/2025)
sita katak, proposta nee hetan aprovasaun hafoin Prezidente FFTL Nilton T. Gusmão dos Santos, Sekretariu Jeral FFTL, José Adilson Ribeiro ho ekipa aprezenta iha reuniaun Konselhu Ministru, neebe lidera direita husi Primeiru Ministru, Xanana Gusmão.
Presiza halo reabilitasaun ba Estadiu Munisipal Dili, tanba estadiu ironika neebe kleur ona sai sentru ba atividade futeból nasional, nunee presiza atualizasaun tuir kriteriu sira iha padraun FIFA/AFC nian ba kompetisaun nasionál no internasional sira.
Aleinde nee, presiza halo mos konstrusaun estádiu foun ida iha Tasi-Tolu, neebe dezenha nu’udar instalasaun modernu ho padraun internasional, hodi apoia kresimentu desportu nian, formasaun no nuudar uma nain ba torneiu rejional no internasional sira iha futuru.
Tanba nee, Prezidente FFTL, Nilton Gusmão mos afirma, inisiativa nee laos deit fo apoiu ba dezenvolvimentu futebol iha Timor Leste, maibe parte ida nuudar orgulhu nasional, dezenvolvimentu desportu, turizmu neebe bele kria mos impaktu sosio-ekonomiku, kria empregu, no hametin papel desportu nuudar instrumentu ida hodi halibur ema hotu.
Desizaun nee marka kompromisu governu nian hodi koloka desportu nuudar parte integrante ba dezenvolvimentu nasional, liu-liu hodi prepara jerasaun foun no hasae Timor Leste nia prezensa iha palku futeból internasional.
Maske halao deit mandatu tinan ida, maibe Prezidente FFTL mos afirma nia kompromisu atu fo impaktu substansiál durante nia lideransa.
“Hau bele iha deit tinan ida atu lidera FFTL, maibe hau determinadu atu halo ida nee sai estraordinariu”, hatete nia liu husi komunikadu.
Konstrusaun ba estadiu rua nee tuir planu sei hahu iha tinan 2025, ho kompletasaun neebe hein iha tinan 2026. Projetu nee sei implementa iha ambitu Parseria Publiku-Privadu (PPP) entre FFTL ho Governu Timor Leste liu husi Ministeriu Planeamentu Investimentu Estratejiku (MPIE).
Reabilitasaun ba Estadiu Munisipal Dili, neebe atu aumenta tribun parte leste ho 2.000 bankadas, no konstrusaun ba Estádiu foun ho kapasidade 15.300 lugares.
Rezultadu aprovasaun ba proposta nee, Prezidente FFTL, Nilton T. Gusmão dos Santos lori FFTL nia naran hakarak hatoo apresiasaun no agradesimentu klean ba Primeiru Ministru Xanana Gusmão no membrus IX Governu Konstitusional tomak, tanba aprova ona proposta FFTL nian kona-ba reabilitasaun Estadiu Munisipal Dili no konstrusaun estadiu no futsal indoor foun ida iha Tasi-Tolu.
Tanba nee, aprovasaun nee reflete kompromisu makaas Governu nian hodi apoia progresu futebol nasionál no dezenvolvimentu infraestrutura desportiva neebe dignu ba povu Timor Leste tomak. Ida nee hanesan pasu istóriku ida neebe sei la hametin deit fundasaun desportu nian, maibe mos sei lori esperansa no entuziasmu foun ba jerasaun foun no sosiedade hadomi nain futebol sira hotu ho hanoin ida atu transforma futebol sai orgulhu nasional.
(alb)
