AMBENO, STLTIMORLESTE.com – Ohin Komandante Jeral Polisia Nasional Timor Leste (PNTL), Komisariu Asistente Polisia Afonso dos Santos ho komitiva vizita Komando PNTL Rejiaun Administrativa Espesial Oecusse-Ambeno (RAEOA).
Vizita nee akompanha husi Komandante Administrasaun PNTL, Komisariu Assistente Polisia Arquimino Ramos, Komandante Sentro de Formasaun Polisia, Superintendente Polisia Bazilio de Jesus, Komandante Unidade Patrulhamentu Fronteira, Superintendente Xefe Polisia Calistro Gonzaga no Segundu Komandante Unidade Polisia Maritima, Inklui Xefe Gabinete Komandante Jeral PNTL ho komitiva.
Komisariu Asistente Polisia, Afonso dos Santos liu husi ninia diskursu iha Komando PNTL RAEOA Kinta nee (18/06/2026) dehan, vizita nee nuudar parte husi programa lideransa PNTL atu monitoriza no avalia diretamente kondisaun servisu iha nivel Komando Munisipiu sira hotu inklui Unidade, nunee bele identifika nesesidade no prioridade sira neebe presiza atensaun husi Komando Jeral PNTL hodi aprezenta ba Governu.
“Hafoin simu mandatu nuudar Komandante PNTL, hau halo ona vizitasaun ba Komando Munisipiu sira hotu no ohin iha Oecusse. Hau husu ba veteranus no povu Oecusse oan tomak atu tau matan ba instituisaun PNTL iha Oecusse,” dehan Komandante Jeral PNTL, Komisarariu Asistente Polisia, Afonso dos Santos iha ninia diskursu.
Iha biban nee nia dehan, hafoin vizita Komando PNTL iha munisipiu hotu-hotu, so iha Oecusse mak hatudu sira nia diferente kultura, hanesan lia dadoli (Takanab), dram Band, Tebe Kultura Atoni (Bsoot), bidu no tara tais, agradese ba Atoni oan sira hotu.
Vizita nee iha fronteira Sakato iha loron Kuarta (17/06/2026), simu direitamente husi Komandante Polisia RAEOA, Superintendente Xefe Polisia, Nicolau Francelino da Costa ho Strutura Komandante RAEOA hotu Inklui Kordenadora AESPNTL RAEOA.
Hafoin too sidade Oecusse, Komandante Jeral PNTL, Komisariu Assistente Polisia Afonso dos Santos halo vizita servisu kortezia ba Unidade Patroliamentu Fronteira Postu Sakato nomos Unidade Polisia Maritima Postu Sakato, Bairru Tael-iu, Aldeia Mahata, Suku Kutete, Postu Administrativu Pantemakassar Rejiaun Administrativa Espesial Oecusse Ambeno, nunee iha loron Kinta dadersan, Komandante Jeral Vitita Batalhiaun Ordem Publiku (BOP) Oecusse mak foin vizita Komando PNTL RAEOA.
(jos)
