DILI, STLTIMORLESTE.com – Liu husi Komunikadu media F-FDTL neebe STL asesu katak, Komando FALINTIL – Forsa Defeza Timor Leste (F-FDTL) halo ensera Formasaun Sistema Informasaun Geografika (GIS)-Arcgis Pro Basiku.
Adjunto Xefe Estadu Maior F-FDTL Koronel Tirosionado Mario Baptista Bersama nee informa, ohin halo enseramentu ofisial ba kursu formasaun Sistema Informasaun Geográfika (GIS) – ArcGIS Pro Básiku, iha salaun auditoriu Kuartel Jenerál F-FDTL, Fatuhada, Dili, Kinta (30/04/2026).
“Formasaun ida nee importante tebes ba iha Komando F-FDTL, ita atu dezenvolve hola parte mos hasae ita nia konhesimentu liu-liu iha mapamentu ninian no bele fasilita ita nia militár sira bele produs mapa ida neebe mak bele dehan katak mais modernu no atualijadu, nunee bele ona kapasita ita nia membru sira husi Komponente no Unidade, ba futuru ita iha rekursu neebe mak ita bele dehan katak sufisiente, ba oin ita mos sei hanoin, hanesan ohin formandus sira hatoo ona, futuru ita sei loke tan formasaun avansadu neebe ho durasaun naruk, hau hanoin ida nee nesesariu tebes bá Komando F-FDTL,” hatete Adjunto Xefe Estadu Maior F-FDTL, Koronel Tirosionado Mario Baptista ba jornalista sira liu husi nia diskursu iha salaun auditoriu Kuartel Jenerál F-FDTL, Fatuhada, Dili, Kinta (30/04/2026).
Nia mos husu ba formandus sira neebe mak ohin simu sertifikadu liu-liu ba ofisiais, sargentu no prasas sira atu kontinua aprende nafatin iha futuru.
“Ba imi formandus sira, hau husu formasaun ida nee importante ba imi, labele haluha, nee hanesan abilidade ida ba ita boot sira, kontinua estuda nafatin, buat ida estuda nee la hotu ba ita, nee hola parte hanesan siensia militár, neebe ita estuda too nivel ida neebe mak ita atinje, tanba agora teknolojia nee sempre iha mudansa, tanba nee mak imi militár sira tenke buka no aprende atualiza nafatin imi nia konhesimentu entermus siensia militár nian,” nia deklara.
Entretantu formasaun ida nee nia finalidade mak atu hasae kapasidade formandos sira iha utilizasaun aplikasaun ArcGIS Pro, hodi halo analise, jere dadus espaciais no produz mapa topográfiku Militár nian, formasaun nee halao durante loron sanulu resin haat (14) kompostu husi Komponente nomós Unidade sira iha F-FDTL.
(jen)
