DILI, STLTIMORLESTE.com – Komandante Munisípiu Dili, Superintendente Xefe Polisia, Orlando Gomes hatete, Komando Jeral Polísial Nasionál Timor Leste (PNTL) orienta membru Polísia Tránzitu hotu iha Komando Munisipiu Dili tenke servisu ho profisionál.
“Komando Munisípiu Díli halao enkontru ho membru Polísia Tránzitu Seguransa Rodaviariu Munisípiu Díli, sira kuaze 80 resin, orienta sira atu servisu bazeia ba orientasaun Komandante Jerál hatoo mai ita nia membru Tránzitu sira atu nune’e sira servisu ho profisionál,” hatete Komandante Munisípiu Díli, Superintendente Xefe Polísia, Orlando Gomes ba jornalista sira iha Komando Munisipiu Dili, Kuarta (09/04/2025).
Nia tenik, membru PNTL sira servisu tuur regra hodi bele orienta Transporte Públiku no privadu lao tuir nia dalan, nunee labele hamosu engarrafamentu iha dalan publiku iha kapitál Dili.
“Oinsa mak sira bele halo servisu diak, halo kontaktu neebe mak diak iha terenu, atu nunee bele asegura movimentu estrada sira ho kontrola transporte sira neebe para iha estrada la tuir regra, haree ba movimentu no engarrafamentu sira iha Dili laran,” nia esplika.
Nia deklara, membru sira atu halo atendimentu ba asidente trafegu sira tenke ho responsabilidade perante iha lei no orden, liu-liu atendimentu ba povu ho dignu atu nunee ba oin povu nafatin tau konfiansa ba instituisaun PNTL.
“Agora daudaun ita nia membru tránzitu iha kapitál Dili la sufisiente no ba futuru presiza aumenta nunee bele koloka membru sira nee ba fatin sira neebe mosu engarrafamentu makaas, aumenta tan atu nunee bele koloka iha postu tránzitu sira neebe mak kolokadu ona iha Dili laran, no mos ita koloka iha fatin sira neebe risku ba engarrafamentu,” nia deklara.
Komando Dili mos kontinua koloka membru sira hodi akompanha situasaun iha kapital Dili, liga ho asidente trafegu sira. Iha mos ekipa ida hodi halo patrulhamentu ka swiping iha Dili hodi implementa lei kódigu Estrada.
Iha fatin hanesan, Motorista Filipe Rodriques Pereira informa, daudaun ne’e Polísia Tranzitu servisu makaas hodi prevene engarrafamentu iha Sidade Dili.
“Polísia Tranzitu nia servisu kapas tebes, tanba bele halo minimiza engarrafamentu iha sidade Dili, ita haree motor ho kareta la para arbiru ona, maibe iha ida rua mak sei para arbiru, maibe Polísia Tranzitu kontinua kontrola, hau hanoin nee diak liu tan,” nia afirma.
(jen)
