DILI, STLTIMORLESTE.com – Komando Polísia Nasional Timor-Leste (PNTL) fo formasaun konaba teknika Polísia Investigasaun ba funsionariu Komisaun Anti-Korrupsaun (KAK) nain 27.
Prezidente CAC, Rui Pereira dos Santos hatete, investigador KAK hamutuk na’in 27 partisipa iha formasaun nee. Balu iha ona esperiénsia husi formasaun básiku polícia iha Sentru Formasaun Rai-Robo, maibé balu seluk mak foin primeiravés partisipa iha formasaun kona-ba área polísia.
“Iha termos investigasaun, ami hetan ona formasaun barak. Maibé matenek kona-ba servisu polísia, ami seidauk iha barak. Tamba ne’e, presiza kompleta ho matenek polísia nian,”hatete Prezidente CAC, Rui Pereira dos Santos ba jornalista sira iha Centru Formasaun Polísia (CFP), Segunda (21/09/2026).
Nia subliña katak, KAK nu’udar órgaun polísia kriminal espesializada, maibé iha aspetu balu kona-ba prátika no prosedimentu polísia ne’ebé presiza aprende husi PNTL. Tanba ne’e, formasaun no kooperasaun ho PNTL konsidera importante atu hasa’e kapasidade investigador KAK.
Nia esplika, Formasaun ba investigador Komisaun Anti-Korrupsaun (KAK) ne’e sei hala’o durante semana ida, ho maioria matéria fó prioridade ba téknika no tátika polísia, ne’ebé kombina entre teoria no prátika.
Organizadór sira esplika katak, husi totál matéria formasaun, aproximadamente 20% sei konsentra ba teoria, enkuantu 80% sei destina ba prátika, atu formandu sira bele aplika diretamente téknika no tátika polísia iha situasaun servisu.
Nia informa, maski tempu formasaun limitadu, formandu sira hatudu kompromisu atu partisipa ativu no fó esforsu máximu, ho objetivu atu kompleta matéria formasaun hotu durante semana ida ne’e.
Kooperasaun entre KAK no PNTL rasik la’ós foin hahú, maibé lao ona desde 2013, ho PNTL kontinua fó apoiu ba atividade no operasaun KAK, liuliu iha operasaun iha terénu.
Iha implementasaun operasaun, KAK mós halo koordinasaun no komunikasaun ho autoridade judisiária, husi nível nasionál to’o nível munisípiu, tuir delegasaun no kompeténsia ne’ebé iha.
Iha parte prátika, formandu sira aprende kona-ba técnica no tátika atu kontrola no detén ema, liuliu tanba kazu sira ne’ebé investigasaun KAK hala’o bele envolve krime grave no situasaun ne’ebé presiza kuidadu espesiál.
Formasaun fizika no prátika ne’e mós importante atu hasa’e habilidade no kapasidade pesoál, hodi sira bele kontrola situasaun ho maneira apropriadu no defende an bainhira hasoru agresaun durante ezekusaun servisu.
Iha fatin hanesan, Reprezentante Komandante Jeral Komisáriu Asistente Polísia Armando Monteiro Informa, Komandu-Geral PNTL Husu Formandu sira Aproveita Formasaun Investigasaun Kriminal
Nia Informa, Komandu Jeral Polícia Nacional Timor-Leste (PNTL) hato’o apresiasaun no konfiansa ba formandu sira ne’ebé partisipa iha formasaun iha Sentru Formasaun Polícia, no husu sira atu aproveita didi’ak oportunidade ne’e hodi hasa’e kapasidade no abilidade iha área investigasaun kriminal.
Nia hatete katak, Sentru Formasaun ne’e sai nu’udar fatin ba membru PNTL sira atu aprende hamutuk, fahe esperiénsia no dezenvolve espesialidade tuir kompeténsia ne’ebé lei atribui ba Polícia iha área investigasaun kriminal.
Komandu Geral mos hato’o apresiasaun ba formadór sira ne’ebé, maski ho tempu limitadu, prepara no hala’o formasaun ba formandu sira. Nia husu formadór sira atu uza didi’ak tempu ne’ebé iha, atu matéria hotu bele finaliza tuir tempu ne’ebé determina.
Nia mós lembra katak, implementasaun Lei Organizasaun Investigasaun Kriminal no esperiénsia servisu iha área polícia hatudu katak, kooperasaun no komunikasaun entre membru PNTL sira importante tebes, liuliu iha prevensaun no kombate korrupsaun.
“Futuru mai, ita presiza iha kooperasaun no komunikasaun di’ak, hodi bele hasa’e ita nia servisu iha área prevensaun no kombate korrupsaun, no kontribui ba Governu no povu Timor-Leste,” nia deklara.
Aleinde ne’e, Komandu Jeral husu formandu sira atu aprende husi esperiénsia no kritika iha pasadu, liu-liu kona-ba operasaun konjunta no atendimentu ba públiku. Nia subliña katak, kritika ne’ebé hetan iha pasadu tenke sai oportunidade atu hadia mekanizmu servisu no aumenta kualidade atendimentu.
Iha formasaun ne’e, formandu sira sei simu matéria teórika no prátika. Parte importante husi formasaun mak atividade fizika, ne’ebé sei ajuda formandu sira prepara an atu hasoru situasaun difísil no agresiva durante ezekusaun servisu polícia.
Komandu Jeral mos husu ba formandu sira atu nafatin observa no komprende situasaun ne’ebé bele mosu iha operasaun, no uza formasaun ne’ebé simu atu hadia kapasidade profisionál.
Iha nia mensajen ikus, Komandu-Geral PNTL hato’o parabéns no votos susesu ba formandu sira durante prosesu formasaun, ho esperansa katak sira bele kompleta formasaun no fila fali ba servisu ho kapasidade ne’ebé di’ak liután.
(jen)
