DILI, STLTIMORLESTE.com – Komando Jeral Polísia Nasional Timor Leste (PNTL) loke ona prosesu ba membru Polísia nain haat (4) neebe envolve iha kazu abuzu poder.
Nia dehan, membru nain 4 nee tenta husu osan ba ema sira neebe mak hatama fugetis ilegal iha area Likisa nian nee konsidera abuzu poder ka subornu.
“Membru nain 4 nee ita kole prosesu oin rua, ida prosesu disiplinar no prosesu kriminál,” hatete Komandante Jeral PNTL, Komisáriu Henrique da Costa ba jornalista sira iha SFP Komoro Dili, Sesta (20/12/2024).
Nia esplika, prosesu kriminal nian rejistu ona iha diresaun investigasaun kriminal nian, disiplinar nian despaixu ba ona iha diresaun justisa nian.
“Sira relata numeru prosesu mai Komando, ita hahu foti ona medida tatolar ka medida transferensia ka suspensaun nian ou buat seluk neebe kriminal nian,” nia esplika.
Nia koalia, membru polísia nain 4 neebe komete kazu abuzu poder nee durante halao servísu iha Munisípiu Likisa.
Antes nee Prezisente Komisaun B iha Parlamentu Nasional (PN) trata Asuntu Defeza no Seguransa, Deputadu Domingos Augusto “Deker” esplika, sansaun disiplinar kriminal neebe mak Komando Jeral PNTL foti ba membru nain 4 nee pozitivu tebes, nunee membru sira labele halo krimi arbiru no halao knaar iha terrenu tuir ordem.
“Sansaun disiplinar neebe mak Komando aplika ba membru sira, nunee sira bele responsabilidade ba aktu krimi neebe mak sira komete,” nia esplika.
Nia deklara, tanba nee Komisaun B husu ba futuru membru neebe mak komete iha kazu krimi, tenke submete ba prosesu no aplika sansaun tuir krimi neebe nia komete.
(jen)
