AMBENO, STLTIMORLESTE.com – Komandante Komando Polisia Nasional Timor Leste Rejiaun Administrativa Espesial Oecusse-Ambeno (PNTL-RAEOA), Superintendente Xefe Polisia, Nicolau Francelino da Costa ho komandante eskuadra sira nomos familia boot PNTL Oecusse, presta omenajen ba Saudozu Francisco Guterres Lu Olo iha Sede Partidu FRETILIN Oecusse.
“Hau hakarak hatoo agradese ba komisaun organizadora Politika partidu Frente de Revolusionariu Timor Leste Independente (FRETILIN) Rejiaun Administrativa Espesial Oecusse-Ambeno (RAEOA) neebe halo preparasaun ba serimonia funebre ba ita nia Aman Gerileru, Eis Prezidente Parlamentu Nasional dahuluk, Eis Prezidente da Republika atual Prezidente Partidu FRETILIN, Francisco Guterres Lu Olo iha Sede Partidu nian iha Oecusse,” dehan Komandante Komandu PNTL RAEOA, Nicolau Francelino da Costa ba STL iha Sede Partidu FRETILIN Bairru Sikluli, Aldeia Sanane, Suku Costa, Postu Administrativu Pantemakasar Oecusse, Kinta (25/06/2026).
Nia dehan, ohin lori ninia ekipa husi komandu PNTL RAEOA mai iha Sede Partidu FRETILIN iha Oecusse, hodi presta Omenajen ba aman ba nasaun, primeiru Prezidente Parlamentu Nasional, Eis Prezidente da Republika nomos hanesan funu nain ba libertasaun nasional Timor Leste (TL) ninian, neebe maka oras nee dadaun la hamutuk ona ho povu TL maibe hamutuk fali ho aman maromak iha ninia kadunan Santo.
“Ohin ami husi komadu PNTL RAEOA, hakat mai iha nee, hodi fo omenajen ikus ba ita nia aman Saudozu, Francisco Guterres Lu Olo, ami nudar Komandu PNTL, ami senti tristeza no lakon lider diak ida iha nasaun TL, lider ida kunhesidu mais famozu, neebe oras nee dadaun la hamutuk ona ho povu TL,” dehan nia.
Tuir Komisaun Politika Partidu Fretilin Oecuse, Domingas Sufa dehan, hahu husi inisiu bain hira maktoban, Saudozu Francisco Guterres Lu Olo hakotu iis iha Malazia, Komisaun prepara meja lilin no bandeira RDTL ho Bandeira FRETILIN iha Sede Partidu FRETILIN iha Oecusse, povu Oecusse organiza malu liu husi instituisaun governu, NGO, Setor Privadu nomos grupo-grupo iha bairru, mai presta omenajen ba Saudozu.
“Hahu inisiu kedan, bain hira maktoban Saudozu Francisco Guterres Lu Olo hakotu ninia iis iha Ospital Internasional Malazia, ami organiza malu prepara meja ho lilin, tau imajen Saudozu nian ho bandeira RDTL no Bandeira partidu nian iha nee, maluk atoni oan sira husi instituisaun governu, liu-liu Prezidente Autoridade RAEOA, Regio da Cruz Salu ho membru Autoridade no funsionariu sira, mai presta omenajen iha nee, inklui mos Sosiedade Sivil, PNTL, nomos grupo oi-oin mai presta omenajen,” dehan nia.
Nia dehan, daudaun nee Komisaun politika partidu FRETILIN Oecusse ho Autoridade RAEOA, Veteranus sira, aban Sesta, tuku 10:00 sei prezide misa funebre ba Saudozu Francisco Guterres Lu Olo iha Igraja Parokia Nossa Senhora do Rosario Oecusse, neebe sei prezide husi Amo Vigariu Parokia Oecusse, Pe. Florindo de Jesus no remata misa, sei kari aifunan iha Semiteriu Cruz, hodi presta omenajen ba Saudozu.
“Ami husu ba Povu Oecusse oan tomak, atu aban partisipa misa requem ba saudozu, Francisco Guterres Lu Olo iha Igreja Parokia Nossa Senhora do Rosario Oecusse, hahu misa tuku 10:00 tanba nee hanesan momentum ikus, fo omenajen,” dehan Domingas Sufa nuudar Komisaun Politika Partidu FRETILIN Oecusse.
Tuir observasaun STL iha Sede Partidu FRETILIN Oecusse, povu Oecusse neebe mai husi instituisaun estadu, NGO, Setor Privadu sira inklui grupo oi-oin no komunidade sira iha Oecusse presta omenajen ba Saudozu Francisco Guterres Lu Olo nia imajen ho bandeira RDTL, Bandeira Partidu FRETILIN neebe komisaun politika partidu FRETILIN prepara iha Sede partidu FRETILIN iha Oecusse.
(jos)
