DILI, STLTIMORLESTE.com – Komando FALINTIL-Forsa Defeza Timor Leste (F-FDTL) marka istoria ida tan konaba serimonia promosaun ba Kadete alunu nain haat (4) neebe remata ona estudu iha akademia Militár Indonezia.
Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” hamutuk ho estrutura tomak no Adido Defesa Indonesia nian iha Timor Leste ohin ofisialmente halao realija serimónia promosaun ba kadete Alunu nain haat (4) neebe remata ona estudu iha akademia Militar Indinésia.
Tenente Jeneral Falur Rate Laek nee aproveita mos semana dahuluk fulan Agostu ida nee hodi formaliza promosaun kadetes Timor-oan sira neebe kompleta ho susesu iha Akademia Militár Indonésia (AKMIL) neebe sira nia serimonia graduasaun halao iha Jakarta iha loron 22 fulan-Jullu 2026. Sira nee mak hanesan timor oan dahuluk neebe frekuenta AKMIL, ho rezultadu neebe diak, nuudar rezultadu husi kooperasaun militár entre F-FDTL no Tentara Nasionál Indonézia (TNI), no mos kompromisu tekniku militár neebe sustenta parseria nee.
Nia esplika, serimonia ida nee ho objetivu presizamente aliña formasaun neebe hetan iha instituisaun neeba ho kategoria korrespondente iha F-FDTL nian hodi halo promosaun.
“Ba graduadu nain haat, hau oferese liafuan ho meritu rekonesidu ba ita boot sira, hotu-hotu hetan rezultadu ezemplar no sei kontinua iha tempu badak ba espesializasaun iha sira nia ramu ida-idak. Ita boot sira nia dedikasaun fo onra ba ami hotu, no fo onra ba farda neebe uza ohin,” nia tenik.
Nia Informa tan katak, investimentu Rekursu Umanu iha Forsas Armadas sai nafatin primordial “Ita tenke kontinua aproveita apoiu husi ita nia parseiru dezenvolvimentu sira, maibe internalmente, dezenvolve ita nia inisiativa rasik, partikularmente iha kuadru Asaun Uniformizasaun nian neebe reforsa koezaun no identidade institusionál. Hein katak fulan Agostu ida nee halo ita unidu, disiplina, no merese memoria neebe ita tenke fo onra,” nia deklara.
Entretantu kadete Alunu nain 4 neebe halo promosaun ba postu Alferes no Sub Tenente mak hanesan, Sub Tenente Lucas Mau Buti Araújo dos Santos neebe remata iha Akademi Militár Angkatan Laut, no Alferes Keyduli R. Graça de Jesus Carvalho no Alferes Giovanino Fátima dos Santos Alves remata iha Akademi Angkatan Darat no Alferes Experi Jezinho Gomes Raul, remata iha Akademi Angkatan Udara.
(jen)
