DILI, STLTIMORLESTE.com – Relasiona ho kazu kona-ba militar sira baku joven iha Likisa, too agora Komando FALINTIL-Forsa Defeza Timor Leste (F-FDTL) seidauk simu keixa ruma husi vitima.
Lia hirak nee hatoo husi portavoz Komando F-FDTL, Kapitaun Mar e Guerra João Silva ba jornalista sira iha Quartel General Fatuhada, Dili, Segunda (14/10/2024).
“Too agora Komando F-FDTL seidauk simu keixa ida, liu husi media hau mos rona, maibe media nee hanesan informasaun lemo lemo deit, soldadu sira iha nia komando no sira organizadu no estruturadu no hirarkia, kuandu soldadu ida halo sala vitima nee mai keixa iha nee, nee mak ita halo investigasaun,” dehan nia.
Nia hatete, kuandu liu deit husi media oinsa mak atu halo investigasaun, tanba nee mak kualker soldadu ida envolvimentu ba iha kualker kazu krime ruma mai hatoo iha komando para tuir prosesu disiplina militar.
Nia akresenta, kuandu militar ruma komete kazu informa mai komando para bele haree, kuandu sala kastigu.
(mar)
