VEMASI, STLTIMORLESTE.com — Movimentu Reafirmasaun Reformasaun Nasional (MORRENA) Postu Administrativu Vemasi, Munisípiu Baucau, ezije ba Governu atu foti asaun ho hadia ka kria lei baze saude publika hodi taka hospital no klínika privada sira iha Timor Leste, tanba konsidera sentru saude privadu sira nee komersializa tiha ema nia moras hodi buka lukru.
Deklarasaun polítika nee hatoo husi Porta-Vóz MORRENA Rejiaun (Munisipiu) Baukau, Natalia dos Santos, bainhira lee sai manifestu iha biban estabelesimentu MORRENA nian iha Postu Administrativu Vemasi, Sábadu (25/07/2026).
Iha deklarasaun nee, Natalia sublina katak mediku sira simu misaun sagrada hodi fo isin diak ba ema, laos atu buka lukru husi povu nia moras.
Nia mos kritika dezenvolvimentu nasional neebe la ho diresaun klaru husi ukun-nain sira dumante tinan 24, neebe fó impaktu aat ba setor produsaun, investimentu, no komunitaiu.
“Setor produsaun kuaze 99% toba dukur hodi loke dalan ba produtu rai liur domina merkadu. Setor saude publika mos sai tiha hanesan merkadoria hodi buka lukru husi povu nia moras,” dehan Natalia dos Santos.
Aleinde husu taka klinika privada sira, MORRENA hatoo pontu ezijensia urjente balun ba Governu atu instrui etika atendimentu iha saude publika no sosa ai-moruk neebe kualidade tuir relevansia moras neebe sirkula barak iha RDTL
Foti asaun seriu ba sae kazu TBC (husi kazu 3.370 iha 2021 sae ba 6.171 iha 2023) no kazu Dengue neebe nafatin husik lakon vida. MORRENA mos husu Governu atu publika dadus Dengue nian husi tinan 2023 too 2025.
No kria regras ho halo teste laboratorial ba aihan importadu sira, hodi proteje saude publika no konserva hahan rai laran.
Iha ninia enseramentu, Porta-Vóz Natalia dos Santos husu ba sidadaun no veteranu sira, atu brani hatoo lia loos no kritika sala sira neebe akontese iha nasaun laran.
“Se uluk o barani mate ba ukun rasik-an, tanba sa ohin o tauk koalia hasoru buat neebe la loos, MORRENA hamriik atu tutur no leba lisuk nasaun nia todan no buka dalan loos ba povu nia moris,” nia ramata.
Iha fatin hanesan, Sekretariu MORRENA, Rejiaun (Munisipiu) Baukau, Aquilis Manuel de Jesus, hatoo mos observasaun ba lalaok governasaun nian husi partidu boot sira neebe kaer ukun iha Timor-Leste.
Nia hatete, husi observasaun neebe halo dumante tinan barak nian, partidu boot haat ka lima neebe kaer ukun sempre tun ba baze iha postu administrativu, munisipiu, too suku sira hodi halo promesa oioin ba povu.
“Sira promete beibeik kona-ba hadia povu nia nesesidade hanesan bee-moos, estrada, saude, no edukasaun. Maibe iha realidade, sira promete iha ibun deit, no ikus mai povu mak sai vítima ba promesa bosok sira-nee,” kritika Aquilis.
Entretantu, Membru MORRENA, Carlos da Silva, husu ba jovens sira iha Postu Administrativu Vemasi, atu brani hamriik no badinas hamutuk ho movimentu nee hodi defende lia-loos ba futuru nasaun nian.
(car)
