DILI, STLTIMORLESTE.com – Prezidente Komisaun B neebe trata Asuntu Negosiu Estranjeiru, Defeza Seguransa iha Parlamentu Nasional, Deputadu Domingos Augusto Deker husu Ministeriu Interior (MI) no Komando Polisia Nasional Timor Leste (PNTL) atu evita pratika familiarizmu iha prosesu rekrutamentu ba membru polisia iha tinan 2025.
“Rekrutamentu kadete foun PNTL, hau koalia ezije beibeik, formal informal ba ministeriu interior no ba Komando PNTL katak, rekrutamentu, komisaun neebe responsabiliza ba prosesu rekrutamentu nee, tenke hases aan husi iha interese hotu-hotu, interese família, interese grupu, interese arte ritual no arte marsiais, rasionalizmu ka sukuizmu nee hau hanesan Prezidente Komisaun B, hau apela ida nee beibeik,” hatete Deputadu Domingos Augusto Deker ba jornalista sira iha resintu PN, Dili. Kinta (20/02/2025).
Nia hatutan, Komisaun B sei la tolera wainhira iha prosesu rekrutamentu ba membru polisia foun nee mosu familiarizmu iha rekrutamentu nee.
“Komisaun B ninia pozisaun la haree no la uza sentimentu, la haree ba dehan se, família seluk tan komisaun B la tolera. Tanba nee mak komisaun B kualidade hanesan reprezentante povu, responsabiliza ba area nee husu ministeriu interior no ba Komando PNTL, liu-liu ba ekipa komisaun rekrutamentu atu profisional,” dehan nia.
Antes nee governu liu husi Konselhu Ministrus aprova projetu rezolusaun Governu nian neebe aprezenta husi Ministru Interior, hodi define nesesidade rekrutamentu iha tinan 2025 ba PNTL no autorizasaun ba abertura konkursu publiku ba admisaun iha Kursu Formasaun Ajente no Kursu Formasaun Ofisial.
Antes nee tuir nota komunikadu neebe STL asesu husi MPKM katak, rekrutamentu nee hanesan medida ida, ho objetivu atu reforsa pesoal PNTL hodi garante kapasidade operasional neebe boot liu no prezensa polisia neebe efisiente liu iha teritoriu nasional tomak.
“Rekrutamentu ba ajente no ofisial foun sira sei rekruta membru foun hamutuk nain 500, neebe 400 sei tama iha Kursu Formasaun Ajente no 100 iha Kursu Formasaun Ofisial,” hatete komunikadu nee.
Rekrutamentu ba ajente no ofisial foun sira sei posivel atu rezolve defisit atual iha rekursus umanus, hadia nivel patrulhamentu no vijilansia nian, atu nunee kontribui ba reforsu seguransa publika nian.
Nia objetivu mos atu promove renovasaun jerasional husi instituisaun, hodi asegura kontinuidade no modernizasaun estrutura polisia nian.
Rekrutamentu ida nee mos ho objetivu atu reforsa reprezentasaun PNTL nian, atu nunee bele garante forsa polisia ida neebe reprezenta liu tan iha diversidade nasional, neebe fundamental atu estabelese relasaun konfiansa no prosimidade ho komunidade oin-oin.
(alb)
