DILI, STLTIMORLESTE.com — Komisaun C iha Parlamentu Nasional (PN) ne’ebé trata asuntu Finansas Publikas, husu Ministériu Koordenadór Asuntu Ekonomia (MKAE) atu lalais aprezenta proposta alterasaun Lei Salariu Minimu ba Konselhu Ministru (KM), hodi bele halo diskusaun no aprova antes haruka ba PN.
Prezidente Komisaun C, Deputada Cedelizia Faria dos Santos hateten katak, MKAE tenki lalais aprezenta proposta ne’e ba KM, tanba salariu minimu ne’ebé trabalhador sira simu atualmente US$115 kada fulan, konsidera la adekuadu ho situasaun ekonomia no nesesidade moris iha tempu agora.
“Tanba ne’e, karik konsultasaun kona-ba lei ne’e to’o ona, ita bele halo alterasaun ba Lei Trabalhador, liu-liu artigu ne’ebé ko’alia kona-ba salariu minimu. Hau husu ba parte kompetente sira ne’ebé hola parte iha prosesu ne’e atu servisu lalais liu tán,” hateten Cedelizia ba jornalista sira iha Parlamentu Nasional, Segunda (24/08/2026).
Tuir nia, durante mandatu IX Governu Konstitusionál, governu liu husi MKAE hahú ona prosesu konsultasaun ho reprezentante trabalhador sira, Kamara Komérsiu no Indústria Timor Leste, no entidade relevante sira seluk, hodi diskute kona-ba proposta alterasaun salariu minimu.
Nune’e, Cedelizia husu MKAE atu finaliza prosesu ne’e no aprezenta lalais ba Konselhu Ministru, hodi bele halo diskusaun no aprovasaun antes haruka ba Parlamentu Nasional atu halo apresiasaun no aprovasaun tuir prosesu lejizlativu.
US$115 la sufisiente ba nesesidade loro-loron
Cedelizia mos husu Governu atu aselera diskusaun kona-ba alterasaun salariu minimu molok eleisaun prezidensiál iha 2027 no eleisaun parlamentár ba mandatu 2028–2032.
Nia konsidera katak salariu minimu US$115 kada fulan la sufisiente atu responde ba nesesidade bázika trabalhador sira no família sira.
“Se kada fulan simu deit US$115, kada loron tenki selu transporte públiku, ne’e deit ona bele gasta osan barak. Se uza tan ba hahán, liu-liu iha família ida ho membru to’o ema nain 10, osan ne’e la to’o atu kobre nesesidade loro-loron,” nia hateten.
Nia hateten tan katak, aumenta folin mina no presu sasán sira bele aumenta presizaun ekonomia ba trabalhador sira, tanba kustu moris kontinua sae.
“Haree tan ba folin mina ne’ebé sae no buat sira seluk ne’e sei fó impaktu ba presu sasán no afeta makaas ita nia trabalhador sira. Estranjeiru sira ne’ebé mai servisu iha Timor Leste hetan salariu ne’ebé boot, tanba ne’e ita tenki haree mos ba salariu ita nia trabalhadór sira,” nia dehan.
Deputada Cedelizia subliña katak, nia espera proposta alterasaun Lei Salariu Minimu bele haruka lalais mai Parlamentu Nasional, atu deputadu sira bele halo diskusaun no apresiasaun antes foti desizaun kona-ba lei ne’e.
(alb)
