DILI, STLTIMORLESTE.com – Komisaun Organizadora ba eventu Dili Internasional Maratona (DIM) ho Radio e Televisão de Timor-Leste (RTTL, EP) asina ona akordu, nunee RTTL sei halo transmisaun direita ba iha eventu DIM.
Komisaun Organizadora ba Dili International Marathon 2026 sente onradu tebes atu konfirma katak RTTL, EP orgaun transmisaun publiku nasional republika nian asina ona akordu nuudar Parseiru Media Ofisial ho patrosíniu transmisaun apoiu servisu neebe signifikativu tebes ba edisaun dala sanulu husi korrida nee.
Radio e Televisão de Timor-Leste sei fo kobertura diretu liu husi televizaun terrestri no online ba mundu tomak iha Loron Korrida nian ho tema “Hadomi Ita-Nia Ai-Laran no Balada Fuik Sira/Love Our Forests and Wildlife”.
Tema tinan ida nee espesialmente mai husi idea Patronu eventu nian, Prezidente Republika, Jose Ramos-Horta, atu hasae konsiensia iha nasaun laran no iha mundu tomak konaba Timor-Leste nia natureza furak neebe estraordinariu, ninia balada fuik sira no atu amplifika no envolve iha konservasaun, reflorestasaun no protesaun ambiental.
Eventu nee hetan apoiu tomak husi Governu liu husi diresaun Primeiru Ministru Kay Rala Xanana Gusmão, ho Vise Primeiru Ministru Francisco Kalbuadi Lay, neebe lidera koordenasaun importante ba eventu nee no ba ekipa organizadora husi Prezidensia Republika.
Tuir akordu nee, RTTL, EP sei lidera produsaun diretu (Live Streaming) ba loron korrida nian iha loron Sabadu, 8 Agostu 2026, hodi transmite eventu nee liu husi televizaun terrestri ba audiensia sira iha Timor Leste laran tomak no, liu husi plataforma online no dijital RTTL, EP nian ba telespetadores sira iha kualker fatin iha mundu. Ema hotu, iha fatin hotu hotu neebe iha koneksaun, sei bele asiste kada kilometru, haklalak, partisipante neebe too iha lina xegada no mos ambiente selebrasaun ba tema maratona 2026 nian tuir lolos tempu akontesimentu nian.
Orgaun transmisaun nee opera ona ba besik tinan ruanulu-resin-lima (kuartu sekulu ida) liu husi tinan primeiru sira harii fali nasaun nian, liu husi prosesu pas, liu husi momentu desportu internasional sira, no liu husi moris loroloron husi komunidade nasional ida neebe rona ninia an rasik no ema seluk rona.
Ida nee duni mak razaun lo-loos tansa RTTL, EP mak sai parseiru ba Dili International Marathon 2026. Hodi servisu hamutuk ho ekipa mídia korrida nian, RTTL, EP sei ativa ninia plataforma hotu hodi tranzmiti loron korrida nee la ho kotu husi hahu too remata:
Tranzmisaun TV terrestri, diretu husi lina hahu no lina remata inklui momentu serimonial hahu apitu hahu nian husi konvidadu internasional importante sira hamutuk ho Prezidente Republika, Jose Ramos Horta.
Komentariu iha lian Tetum no Ingles sei halao hamutuk, atu nunee korrida nee bele esplika ba família Timoroan hotu-hotu ho lian neebe bele komprende liu iha sira-nia tilun, no iha tempu hanesan apoiante sira husi mundu tomak mos bele akompana.
Tranzmisaun diretu (live streaming) iha portal online no kanal dijital RTTL, EP nian, neebe transmite simultaneamente atu nunee diaspora Timoroan sira husi Lisboa too Sidney, husi Macau too Lisboa no belun Timor Leste nian sira iha kualker fatin iha mundu bele akompana hakat ida-idak iha loron nee en tempu real.
Kobertura diretu Radio/TV liu husi servisu nasional RTTL, EP nian ho atualizasaun kontínua husi orariu hahu (partida) haat Maratona (05:30 dader), Meia-Maratona (05:45 dader), Paralímpiku 10 km (06:00 dader) no Fun Run / Halai Ksolok 5 km (07:00 dader).
Entrevista antes korrida ho atleta, VIP no bainaka sira iha DIM EXPO iha loron 8 Agostu 2026, hodi konta istoria korrida nian antes no hafoin apitu hahu lian. Kobertura mos sei inklui programa ofisial enserramentu ba loron korrida husi lina xegada, inklui serimonia entrega medallia no liafuan ofisial taka nian husi Prezidente Republika.
Maratona tinan ida nee lori tema ida neebe iha resonansia dook liu fali mundu atletizmu nian “Hadomi Ita-Nia Ai-Laran no Balada Fuik Sira / Love Our Forests and Wildlife.”
Maratona ida laos deit korrida bainhira nia mak korrida nasaun nian. Halo parsaeria ho RTTL, EP orgaun tranzmisaun neebe sai ona akompanante loroloron ba família Timoroan ida idak halo Maratona Dili sai nuudar eventu ida neebe too iha aldeia no sidade hotu iha nasaun laran, no iha tempu hanesan, ba Timoroan hotu neebe harii ona sira-nia moris iha rai-liur. Parsaeria ho RTTL, EP mos onra intensaun Komisaun Organizadora nian hodi harii korrida ida nee ho dalan neebe inkluzivu, soberanu no ho orgullu nuudar Timoroan korrida ida neebe nasaun mak nain no nasaun mak hatoo istoria ba ninia an rasik.
Diretor Eventu Dili International Marathon, Sean Borrell liu husi Komunikadu neebe STL asesu Kinta nee (30/07/2026) hatete konaba eventu nee, eventu sira hanesan Dili International Marathon posível tanba apoiu finanseiru estraordinariu neebe fornese husi orientasaun Vise Primeiru-Ministru nian liuhusi koordenasaun ho Ministeriu Finansas.
“Fundu krítiku sira-nee kobre maizumenus 60% husi kustu total eventu nian no tanba nee parsaeria sira hanesan ezemplifika iha ita-nia anunsiu ohin loron ho RTTL, EP mak garante katak kobertura ba eventu nee tranzmiti diretu iha nivel mundial no ho kualidade mundial, hodi mos redus kustu total ba Governu. Ho parsaeria ida-nee, RTTL, EP sei halai hamutuk ho nasaun. Kilometru idaidak husi Arku Partida too Lina Xegada, haklalak ida idak husi voluntariu sira, bee hemu iha estasaun bee nian hotu-hotu sei transmite diretu, gratuita, ba Timoroan sira-hotu no ba mundu. Ida-nee mak signifikadu bainhira korrida ida sai momentu nasional ida. Ami orgullu tebes atu hakat iha dalan nee hamutuk ho ita-nia orgaun tranzmisaun nasional,“ katak Diretor.
Nunee mos Rosario da Graça Maia, Prezidente Konselhu Administrasaun RTTL, EP hatutan, nuudar orgaun tranzmisaun publiku nasional Timor-Leste nian, RTTL, EP orgullu atu sai parseiru ho Dili International Marathon 2026 hodi lori eventu estraordinariu ida nee ba uma-laran komunidade hotu iha nasaun laran tomak no ba komunidade Timoroan sira iha mundu tomak.
“Parsaeria nee reflete ami nia misaun servisu publiku nian; atu informa, hamutuk, no inspira liuhusi tranzmisaun neebe kualidade. Hodi fornese kobertura diretu, free-to-air (sinal livre) no dijital, ami laos deit hatudu determinasaun halai-nain ida-idak nian maibe mos amplifika mensajen importante ba tinan ida-nee nian, Hadomi Ita-Nia Ai-Laran no Balada Fuik Sira (Love Our Forests and Wildlife),” hakotu.
(eme)
