DILI, STLTIMORLESTE.com – Komandante Jerál Polísia Nasionál Timor Leste (PNTL), Komisáriu Asisténte Polísia Afonso dos Santos husu ba Komandante no Ofisiál Superiór atu sai líder ezemplár ba membru PNTL sira hotu.
“Komandante ida laos deit ema neebe fo orden, maibe tenke sai hanesan ezemplu moris ba nia subordinadu sira. Ita nia atitude, liafuan no asaun loron-loron mak sai referénsia ba membru sira iha okos. Tan nee, komandante ida tenke hatudu integridade, disipliña no profisionalizmu iha tempu hotu, iha servisu no mos iha moris loron-loron,” hatete Komandante Jerál Polísia Nasionál Timor Leste (PNTL), Komisáriu Asisténte Polísia Afonso dos Santos iha nia intervensaun, bainhira prezide parada jerál fulan Abríl iha Kuartel Komando Jerál PNTL Kaikoli, Tersa (07/04/2026).
Nia dehan, Komandante neebe diak mak nia bele lori nia membru sira ho lideransa neebe klaru, justu no responsavel. Labele fo orden deit, maibe tenke mos fo orientasaun neebe loos no akompanha implementasaun iha terenu.
“Komandante ida tenke hatene katak kada orden neebe nia fo, sei iha konsekuénsia direta ba seguransa, vida no konfiansa públiku,” nia deklara.
Komisáriu Afonso hateten, tan nee, responsabilidade komandante nian la para iha tempu nia fo orden. Komandante tenke toma responsabilidade tomak ba orden sira neebe nia fo, inklui rezultadu husi implementasaun iha terenu.
“Se iha susesu, komandante tenke fo rekonhesimentu ba nia membru sira no se iha sala, komandante tenke prontu atu simu responsabilidade no hadia situasaun ho lo-loos,” nia tenik.
Nia hatutan, lideransa neebe forte mos presiza abilidade atu rona no komprende nia subordinadu sira. Komandante ida tenke bele halo komunikasaun neebe efetivu, kria ambiente servisu neebe saudavel, no motiva membru sira atu halo sira nia dever ho dedikasaun no espiritu servisu.
“Hau hakarak subliña katak, autoridade neebe ita iha hanesan komandante mak akompanha ho responsabilidade boot. Tan nee, uza autoridade nee ho lo-loos, ho justisa no ho sabedoria, atu asegura katak kada desizaun neebe ita foti sei fo benefisiu ba instituisaun no povu tomak”, nia informa.
Nia enkoraja komandante hotu atu kontinua hadi’a aan, hametin valór sira hanesan lealdade, disipliña, profisionalizmu no responsabilidade, sai hanesan lider neebe bele fo inspirasaun ba membru sira atu servisu ho diak liu tan.
“Ho lideransa neebe diak, ita sei bele hadia instituisaun no aumenta konfiansa públiku ba Polísia Nasional Timor Leste. Obrigadu barak ba ita hotu. Mai ita hamutuk hodi termina susesu servisu PNTL,” nia hatutan.
Iha biban nee, Komisáriu Afonso husu ba Polisia feto iha papél importante tebes iha instituisaun Polisia Nasionál.
“Sira laos deit kontribui iha servisu seguransa, maibe mos sai ponte importante entre polísia no komunidade, liu-liu iha kazu sira neebe envolve feto no labarik,” nia koalia.
Nia konsidera prezensa polísia feto ajuda hasae konfiansa públiku, fó sentimentu seguransa no fasilita komunikasaun ho vitima sira.
“Sira mos iha kapasidade atu halo abordagem neebe sensível, pasiente no umanu, neebe importante iha tratamentu kazu sira sensitivu. Tan nee, importante tebes atu fo oportunidade hanesan ba polisia feto, hametin kapasidade sira, no valoriza sira nia kontribuisaun iha servisu Polísia Nasionál,” nia afirma.
(jen)
