DILI, STLTIMORLESTE.com – Komandante Jerál (KomJer) Polísia Nasionál Timor Leste (PNTL), Komisáriu Asistente Polísia, Afonso dos Santos hatoo parabens no apresiasaun ba membru Unidade Espesial Polísia (UEP), neebe komemora tinan 17 nia ezisténsia, ba sira nia dedikasaun, disiplina, profisionalizmu no espíritu servisu ba povu no nasaun.
“Tinan 17 unidade ida nee nia ezisténsia reprezenta tinan 17 husi dedikasaun, disiplina, profisionalizmu no espíritu servisu ba nasaun. Ita boot sira nia servisu dala barak ezijente no halao iha sirkuntansia difísil, nunee merese hetan respeitu no rekonhesimentu husi PNTL tomak,” hatete Komandante Jerál Polísia Nasionál Timor Leste (PNTL), Komisáriu Asistente Polísia, Afonso dos Santos iha ambitu komemorasaun aniversáriu ba dala-17 Unidade Espesial Polísia (UEP), iha UEP Bairo Pité, Dili, Sesta (14/08/2026).
Komandante Jerál PNTL mos apelu ba membru UEP atu kontinua kumpri sira nia misaun ho disiplina, korajen, profisionalizmu no respeitu ba sidadaun sira, no nafatin fo onra ba farda neebe sira hatais no valores PNTL nian.
“Ho naran Komando Jerál PNTL, iha loron espesial ida nee, hau hatoo nia parabéns ba membru UEP tomak, ba ita boot sira nia aniversáriu. Hau dezeja susesu nafatin ba ita boot sira, iha ita boot sira nia misaun,” nia esplika.
Nia mos agradesimentu sinseru ba parseiru nasional no internasionál sira hotu neebe durante tinan hirak liu ba kontinua fo apoiu ba dezenvolvimentu no hasae kapasidade PNTL, liu-liu ba Unidade Espesial Polísia (UEP). Agradesimentu espesial mos hatoo ba GNR Portugal no AFP Austrália, ba sira nia kooperasaun, formasaun, orientasaun no apoiu kontinua ba PNTL no UEP.
“Hau mos hakarak hatoo ami nia apresiasaun klean ba Governu no instituisaun sira husi Repúblika Popular Xina, Repúblika Korea do Sul, Estadus Unidus Amerika no Repúblika Indonezia, ba apoiu no kooperasaun neebe kontribui ona hodi hametin kapasidade forsa Polísia Timor Leste. Ba ami nia parseiru nasional no internasionál sira hotu, ami hatoo mos ami nia obrigadu boot ba ita boot sira nia konfiansa, amizade no kompromisu ba Timor Leste,” nia deklara.
(jen)
