BAUKAU, STLTIMORLESTE.com – Kompanhia Sanira Unipessoal Lda abandona projetu konstrusaun edifisiu Eskola Kafé, iha Aldeia Samalakuliba, Suku Builai, Postu Administrativu Baukau Vila, Munisipiu Baukau.
Diretor Servisu Edukasaun Munisipiu Baukau, Afonso dos Santos da Costa esplika, projetu konstrusaun edifisiu Eskola Kafé implementa iha tinan 2013, neebe Governu liu husi Ministeriu Edukasaun kontratu kompanhia lokal Sanira, maibe too ohin loron seidauk entrega ba Governu no deskonfia kompanhia abandona projetu.
“Ita preokupa liu, tanba infraestrutura nee la hotu no husik hanesan nee deit hodi abandona, hanesan Timoroan ita preokupa,” hateten Afonso ba jornalista sira hafoin observa projetu konstrusaun edifisiu Eskola Kafé iha Samalakuliba, Baukau, Sesta nee (11/04/2025).
Projetu konstrusaun edifisiu Eskola Kafé iha Baukau andar ida, kompostu sala 12 no fatin sanitasaun, ho total orsamentu hamutuk milhaun US$ 6 resin neebe Ministeriu Edukasaun aloka husi Orsamentu Jeral Estadu (OJE) 2012 ho durasaun konstrusaun tinan 1, neebe hahu konstrusaun iha tinan 2013 no remata iha tinan 2014.
Progresu fiziku kuaze atinji diak, tanba asesoria sira hanesan ajulezu, plafon, janela no odamatan inklui instalasaun eletrisidade no pinta remata inisiu tinan 2017, maibe kompanhia la entrega ba Governu, nunee iha tinan 2018 kalen neebe taka iha uma leten parte ba leste nian hetan sobu total husi anin boot too kompanhia abandona.
Hafoin parte kompanhia abandona iha tinan 2018, too tinan 2025 nee kuaze asesoria sira hanesan plafon, janela no odamatan inklui instalasaun eletrisidade hetan estragus total husi ema deskonhesidu sira, tanba konstrusaun refere la besik liu uma komunidade.
“Hanesan sidadaun Baukau oan hakarak projetu nee lao para finaliza atu uza, maibe kuandu husik tiha projetu hanesan nee ladun iha responsabilidade, neebe diak liu, liu husi investigasaun ruma para ita haree, tanba saida la lao,” Afonso akresenta.
Pesoal entrega rai, Marcelino Diego Marques haktuir, konstrusaun refere parte kalen neebe kompanhia taka kuaze sobu dala rua, dahuluk konsege kompanhia taka hikas, enkuantu akontese ba daruak, parte kompanhia retira husi fatin projetu too ohin loron.
“Kompanhia ba mos la tau seguransa ruma iha nee, sasan sira nee ema estraga hotu,” Marcelino sublina.
Too notisia nee publika, jornalista STL korespondente Munisipiu Baukau la konfirma kompanhia, tanba edifisiu iha Dili.
(tom)
