DILI, STLTIMORLESTE.com – Relasiona ho kazu deskonfia trafiku umanu ba sidadaun Pakistaun nain 12, nain ba kompanha Keshavarz Great Timor Unipessoal LDA, rezeita ho informasaun balu husi pesoal nain 2 husi India neebe mak fo deklarasaun ba publiku katak, empreza la selu salariu husi trabalhador refere no viola sira nia direitu.
Tuir nain ba Kompanhia Keshavarz Great Timor Unipessoal LDA, Ayup Josep Karami l deklara, pesoal nain 2 husi India ho naran Manoj ho Gregorio neebe fo deklarasaun falsu ba governu no publiku Timor Leste.
“Hau rezeita tanba hau iha dokumentus kompletu neebe hein deit prosesu husi tribunal, kuandu prosesu Tribunal konklui ona mak foin deporta trabalhador hirak nee ba sira nia fatin, agora pesoal nain 2 nee dehan atu lori deit ema sira nee sai husi Timor Leste hau lakohi, hau husu governu atu hein lai desizaun husi tribunal hotu mak sira foin sai,” dehan nia ba jornalista sira iha Hera, Dili, Segunda lokraik (11/11/2024).
Iha fatin hanesan, Manejer Kompanhia Keshavarz Great Timor Unipessoal LDA, Sixto Soares mos hatutan, pesoal husi India nain 2 suporta trabalhador nain 12 neebe mak halo krime hasoru kompanhia Keshavarz Great Timor Unipessoal LDA, krime sira nee mak hanesan oho animal sira hanesan bibi, karau, manurade nomos sira naok ikan.
“Ami hakarak husu ba Gregorio ho Manoj ema Pakistaun nain 12 nee iha neebe no sira keisa dehan sira mak vitima nee la los, ami hakarak deklara iha media katak informasaun neebe mak fo sai husi individu nain 2 iha media nee la los,” nia tenik.
Nia dehan, trabalhador Pakistaun nain hira nee mos labele halo viajem ba rai liur wainhira problema nee seidauk hotu.
Entretantu Pesoal Apoiu Juridiku ba Kompanha Keshavarz Great Timor Unipessoal LDA, Tito Jeronimo akresenta kazu neebe mak sira akompanha katak, kompanhia la selu maluk sira husi Pakistaun, laos la selu maibe selu.
Nia haktuir, iha tempu neeba iha problema oituan, entaun labele selu tanba sira oho animal no foti ikan sira, entaun husi kestaun ida nee mak kompanha labele selu no sei lao tuir lai nia prosesu.
(mar)
