BAUCAU, STLTIMORLESTE.com – Deskonfia kompanhia lokal Nautetu Fatima Unipessoal Lda, abandona projetu konstrusaun bee moos iha Suku Letemumo, Postu Administrativu Quelicai, Munisipiu Baucau.
Xefe Suku Letemumo João Soares Correia aprezenta, projetu refere implementa antes tiha ona hafoin nia hetan fiar husi komunidade eleitu nuudar Xefe Suku Letemumo, maibe too ohin loron projetu refere seidauk finaliza, tanba kompanhia implementador projetu abandona servisu.
“Nee kompanhia Nautetu, kanaliza bee moos husi Uaibitai mai Quelicai Vila ba kada instituisaun nomos kanaliza ba komunidade sira neebe hela iha Quelicai Vila nee agora servisu la lao. Komesa husi Dezembru too mai agora,” hateten Xefe Suku Letemumo João Soares Correia ba STL liu husi telefone, Kuarta (17/06/2026).
Nia rekonhese, durante implementasaun projetu refere iha dezenvolvimentu balu iha terrenu, maibe Autoridade Suku hamutuk ho postu rezolve ona dezentendimentu refere iha Sede Suku Letemumo fulan Setembru liu ba no husu kompanhia atu kontinua hikas fatin servisu, maibe too agora seidauk kontinua servisu.
Nia komenta, situasaun nee halo Autoridade Suku triste, tanba tinan naruk ona too agora komunidade Suku Letemumo infrenta bee moos, nunee garante ona ba projetu refere, maibe finalmente kompanhia abandona servisu.
“Hanesan autoridade hau sempre aprosima ho nain ba kompanhia mais fo deit garantia katak iha tempu badak konstrusaun nee remata, maibe seidauk. Hau tenta BTL mos informasaun too agora seidauk lao,” João informa
(tom)
