DILI, STLTIMORLESTE.com – Kompanhia Zeneca Zeno hetan kontratu husi Governu Timor Leste (TL) liu husi Prezidente Autoridade Munisipiu (PAM) Dili, hodi halo limpeza sidade Dili, tanba nee daudaun trabalhador hamutuk 20 mak oras nee halo servisu limpeza iha area Vera Cruz, Munisipiu Dili.
Tuir Advisor Kompanhia Zeneca Zeno, Agustinha de Fatima ba STL iha Caicoli Dili, Kinta (09/04/2026) katak, daudaun Kompanhia Zeneca Zeno hetan kontratu ho governu atu halao limpeza iha sidade Dili, tanba nee kompanhia rekruta ona trabalhador nain 20 iha area Vera Cruz hodi servisu limpeza jeral iha sidade Dili, hamoos valeta kuak nomos faho duut neebe aas iha estrada ninin.
“Ami nia area servisu mak halo limpeza iha Postu Administrativu Vera Cruz, Munisipiu Dili, ho tipu servisu mak hamoos ai-horis neebe moris iha estrada ninin, duut neebe moris, hamoos valeta kuak neebe nakonu iha aqua mamuk, plastiku nomos halo limpeza jeral hanesan dasa rai iha estrada ibun sira nomos estrada laran, ida nee mak ami nia servisu. Ami foin mak hahu servisu loron rua, hahu iha loron Tersa (08/04/2026 no loron ohin Kinta (09/04/2026). Iha nee trabalhador Timoroan sira neebe mak daudaun halo servisu hamutuk 20 pesoas no servisu nee troka malu. Ami servisu limpeza nee hahu iha tuku 7:00 dadersan no remata iha tuku 11:00, nunee kontinua servisu iha tuku 2 media too lokraik,” dehan Agustinha.
Iha biban nee nia husu ba komunidade sira neebe mak hela iha sidade Dili, balun faan sasan iha loja, dalan ninin atu labele soe lixu arbiru, tenke tau iha ninia fatin nunee ekipa husi Kompanhia Zeneca Zeno bele raut hodi lori ba fatin neebe mak governu prepara ona.
“Hau husu ba komunidade sira iha Sidade Dili atu labele soe foer arbiru iha valeta kuak, maibe kuandu soe foer arbiru tempu udan foer intupidu, komunidade sira mak sei sai vitima ba inundasaun,” dehan nia.
Iha biban nee, trabalhador kompanhia Zeneca Zeno, Alexandre Soares sente kontente tanba bele hetan netik kampu trabalhu hodi limpeza sidade Dili.
“Hau sente kontente tanba governu fo fiar ba Kompanhia Zeneca Zeno halo limpeza iha Sidade Dili no hau hanesan trabalhador ida, agradese no kontente bele hetan kampu trabalhu hodi asegura sidade Dili moos liu husi atividades limpeza,” dehan Alexander.
Nia haktuir tan katak, sira foin servisu durante loron rua, orseik no ohin, iha kontratu neebe kompanhia halo ho trabalhador mak servisu dasa rai, hamoos foer sira iha estrada ninin inklui duut sira neebe moris iha estrada ninin, no kada fulan kompanhia selu trabalhador kada ema ida hetan salariu US$ 130.00.
“Hau sente kontente tebes-tebes ho kampu servisu ida nee, atu garante hau nia moris liu-liu suporta hau nia nesesidade uma laran nomos hau nia oan nia nesesidade ba eskola,” dehan nia.
(jos)
