DILI, STLTIMORLESTE.com – INFPM afirma kompras aimoruk liu husi public tender, ho prosesu ne’ebé bele lori to’o fulan neen molok sasán chega.
Diretora Ezekutivu INFPM, Paulina Mendonca Maher klarifika katak, orsamentu instituisaun US$17 miliaun la’ós hotu destina ba kompras aimoruk.
Husi montante US$ 17 miliaun, serka US$ 14 miliaun destina ba kompras aimoruk no nesesidade medikamentu sira.
US$ 1,5 miliaun transfere ba UNICEF atu kompras vasina regular, enquanto US$ 1 miliaun selu taxa ba sasán ne’ebé tama husi aeroportu.
Restu US$ 12 miliaun destina ba kompras medikamentu, konsumables no reagentes tuir nesesidade instituisaun.
“Armajen sentral hanesan tranzitu deit. Bainhira sasán tama, tenke distribui ba HNGV no ospitais rejionál sira,” dehan Paulina.
Nia hateten katak, armajen INFPM la’ós fatin atu rai stok nakonu permanentemente, tanba sasán ne’ebé tama tenke distribui tuir nesesidade.
Paulina esplika, public tender normal iha INFPM bele lori to’o fulan neen, hahu husi prosesu tenderizasaun to’o sasán chega.
Nia hateten, produsaun aimoruk iha rai liur rasik bele lori besik fulan tolu, antes sasán bele chega ba Timor-Leste.
Public tender sira publika liu husi pájina INFPM, inklui informasaun kona-ba planeamentu no orsamentu baze ba kompras.
Nia dehan, iha kazu balu, valor oferta kompaniá sira bele liu orsamentu baze ne’ebé determina iha planeamentu kompras.
INFPM uza public tender no single source tuir mekanismu aprovizionamentu ne’ebé disponivel iha regulamentu no lei.
Kompañia ne’ebé fornese aimoruk ba INFPM hamutuk 14, kompostu husi kompaniá nasionál no internasionál.
Paulina agradese ba Komisaun F nia fiskalizasaun, ne’ebé halo monitorizasaun ba servisu INFPM to’o iha munisípiu sira.
Diretór Kompras INFPM, Sergio da Costa, dehan mekanismu aprovizionamentu barak, inklui single source, maibé prosesu sira presiza tempu.
“Hanesan public tender ida, mínimu presiza fulan neen molok sasán chega, tanba supplier tenke halo akordu ho manufacturer,” dehan Sergio.
Nia hateten, supplier sira presiza halo preparasaun, inklui negosiasaun ho manufacturer no organiza transporte husi rai seluk.
Sergio mos dehan, konflitu iha Médiu Oriente bele afeta transporte no folin sasán, ne’ebé bele aumenta kustu aprovizionamentu.
Nia hateten, prosesu aprovizionamentu envolve ekipa avaliador, Direksaun Kompras no seksaun inspesaun hanesan elementu prinsipál tolu.
“Elementu tolu ne’e kompostu prosesu aprovizionamentu. Bainhira ida falta, prosesu kompras labele lao,” dehan Sergio.
Nia esplika, bainhira ekipa juri resigna, situasaun ne’e bele impede prosesu tenderizasaun no hamosu atrasu aprovizionamentu aimoruk.
Sergio subliña katak bainhira prosesu aprovizionamentu la lao, sasán foun labele tama tuir tempu no bele afeta disponibilidade aimoruk.
(dom)
