BAUCAU, STLTIMORLESTE.com – Projetu reabilitasaun estrada husi Caisidu to’o Rotunda Vila Antiga, liuhusi Suku Caibada, Postu Administrativu Baucau Vila, Munisípiu Baucau, rejista komunidade afetadu hamutuk 30 resin.
Xefe Suku Caibada, Cosme da Costa Lopes, esplika katak projetu reabilitasaun estrada refere responsabilidade husi kompaña JOVA Construction Unipessoal Lda., ne’ebé hala’o ona servisu alargamentu estrada iha área Caisidu to’o Suku Caibada.
Durante prosesu alargamentu estrada, parte tékniku husi Ajénsia Dezenvolvimentu Nasionál (ADN), no kompaña hamutuk ho Autoridade Suku halo ona identifikasaun ba komunidade no propriedade sira ne’ebé hetan impaktu.
“Komunidade hotu-hotu iha kooperasaun. Ita identifika ona tanki, garajen kareta, plantasaun, lutu no uma komunidade balu ne’ebé varanda afeta. Ita halo kontajen iha 30 resin afetadu, maibé la’ós impaktu todan, tanba iha balu hasai de’it varanda,” hateten Cosme ba STL iha Vila Antiga, Baucau, Segunda (21/09/2026).
Nia subliña katak durante alargamentu estrada iha Suku Caibada, komunidade sira kontribui ona liuhusi fó plantasaun, área uma hela-fatin no propriedade sira seluk.
Maibé, kona-ba indemnizasaun ba propriedade afetadu ne’e, Cosme hateten responsabilidade kona-ba asuntu refere iha parte Ministériu nia liman.
Aleinde propriedade privadu sira, alargamentu estrada ne’e mós afeta edifísiu Eskola Ensinu Báziku Filial Caibada, inklui sala aula rua. Asuntu ne’e, tuir Autoridade Suku, presiza koordenasaun entre Ministériu Edukasaun no Ministériu Planu no Investimentu Estratéjiku (MPIE).
Maski nune’e, komunidade Suku Caibada hatudu kooperasaun iha prosesu alargamentu estrada, tanba projetu ne’e konsidera bele fó benefísiu ba asesu komunidade, liuliu ba merkadu, transporte no situasaun emerjénsia.
“Komunidade ko’pera, tanba dala ne’e la’ós ba komunidade Caibada de’it atu utiliza, maibé nia benefísiu mak komunidade Caibada bele asesu ba merkadu no emerjénsia sira ho lalais,” Cosme komenta.
Tuir observasaun Autoridade Suku iha terenu, kompaña responsavel ba projetu ne’e agora hahú ona faze daruak, ho servisu konstrusaun valeta ne’ebé hahú ona husi área Caisidu no sei kontinua to’o área Suku Caibada.
Nia katak, reabilitasaun no alargamentu estrada ne’e sai esperansa foun ba komunidade Caibada, tanba kondisaun estrada antes ne’e konsidera difísil afeta tebes movimentu komunidade no transporte.
Liga ho asuntu ne’e, STL seidauk hetan komentáriu husi kompaña JOVA Construction Unipessoal Lda. no Ministériu responsavel kona-ba projetu, liuliu kona-ba prosesu indemnizasaun ba komunidade no propriedade sira ne’ebé afetadu.
(tom)
