ZUMALAI, STLTIMORLESTE.com – Komunidade iha Suku Zulo, Postu Administrativu Zumalai, Munisípiu Covalima, enfrenta falta bee ba hemu no tein, tanba bee iha posu ne’ebé sira uza menus, nune’e komunidade tenke hein malu atu kuru bee no ense ba jergen.
Komunidade husi Aldeia Lale, Suku Zulo, Justina Cardoso, hateten katak agora dadaun komunidade ne’ebé hela besik posu sira tenke hein malu iha bee matan, tanba bee ba hemu no tein menus. Bainhira posu nakonu, foin mak komunidade bele ense bee ba jergen.
“Bee posu ne’ebé ami uza ba hemu no tein, bee menus, halo ami tenke kuru no ense ba jergen ho hein malu. Bainhira bee nakonu, foin mak ami bele ense ba jergen. Bee torneira ne’ebé uluk ami asesu, kuaze tama ona tinan haat la sai, nune’e ami uza deit bee posu tolu ne’ebé besik ami-nia uma,” dehan Justina ba STL, Domingu (27/09/2026).
Nia hateten katak bee posu ne’ebé uza ba haris no fase roupa iha tempu atual nakonu, maibé bee ne’ebé uza ba hemu no tein menus. Kondisaun ne’e halo komunidade tenke hein malu, tanba bainhira ema ida remata ense bee, ema seluk foin bele kuru.
“Bee ba haris no fase roupa nakonu, maibé bee ba hemu no tein menus, tanba ne’e ami tenke hein malu. Bainhira ema ida ense remata, ema seluk foin bele ense,” nia hateten.
Enkuantu, joven Rafael Mendonça, hateten katak bee posu sira ne’e durante ne’e mak komunidade uza ba nesesidade loroloron, inklui hemu, tein no fase roupa. Maibé, bainhira udan la monu, bee iha posu sira menus.
“Bee posu nee desde uluk to’o agora la maran, maibé bainhira udan la iha, bee menus. Bainhira udan monu, bee nakonu,” nia informa.
Nia hateten katak, situasaun ne’e halo komunidade tenke kuru bee ho sistema hein malu, liuliu iha tempu udan la monu.
Marito Barros, lia-nain iha Suku Zulo, hateten katak iha bee posu tolu ne’ebé besik komunidade nia uma. Posu ida uza ba hemu no tein, enkuantu posu rua seluk uza ba fase roupa no haris.
Nia hateten katak, posu ida besik liu komunidade nia uma, enkuantu posu rua seluk presiza komunidade lao sae rai lolon atu bele asesu ba bee.
(jac)
