BAUCAU, STLTIMORLESTE.com – Komunidade no Autoridade husi Postu Administrativu tolu (3) hamutuk ho FALINTIL-Forsa Defeza Timor Leste halo preparasaun fatin ba serimonia 20 Agostu, neebe sei realiza iha foho Matebian, Suku Abo, Postu Administrativu Matebian, Munisipiu Baucau.
Administrador Postu Administrativu Matebian, Domingos Pereira hateten, preparasaun ba loron 20 Agostu 2026 ba dala 51 anivel Nasional realiza iha Suku Abo, Postu Matebian, organiza husi ekipa Nasional husi Ministeriu relevante sira, neebe Autoridade Postu Matebian la inklui iha komisaun organizadora ba eventu refere, maibe hanesan Autoridade Postu ba area Postu Matebian iha dever moral, halo kontribuisaun natoon, liu husi mobilizasaun komunidade sira iha prosesu preparasaun ba loron Nasional refere.
“Ba ami neebe agora halao servisu iha nee mak hanesan husi Autoridade Postu Quelicai Antigu, Quelicai no Matebian, maibe laos ami Autoridade deit inklui mos komunidade sira hamutuk ho ita nia Forsa, ami halo servisu iha nee,” hateten Domingos Pereira ba STL liu husi telefone, Kinta (13/08/2026).
Nia informa, servisu preparasaun neebe komunidade hamutuk ho Autoridade sira husi Postu tolu refere kontribui mak hanesan foti fatuk no ateru ba rai kuak sira no prepara ai ba fatin bainaka sira atu tuur inklui fatin diskursu nian. Enkuantu seluk mak ekipa husi Institutu Gestaun Ekipamentus (IGE) mos, daudaun nee halao servisu ateru estrada ho Kilometru (Km) 4 resin, kobre husi Suku Laisorulai too Abolir.
Nia espresa, selebrasaun loron refere sei fo rendimentu ba komunidade lokal neebe sei faan sira nia produtu lokal iha fatin seremonia, aliende mos fo espasu ba Governante sira koinhese kondisaun infraestrutura bazika Postu Matebian nian.
“Hau nia esperansa mak, ami nuudar Postu foun kontente ho selebrasaun ida nee, tanba seremonia nee sei partisipa husi Governante sira neebe sei haree direita ami nia difikulta no situasaun neebe mak Postu Matebian infrenta,” Domingos akresenta.
Iha sorin seluk, Veteranu tinan 24, Marciano da Cruz “Boulesa” espresa sentimentu kontente, tanba Governu deside area foho Matebian sai fatin ba selebrasaun loron 20 Agostu dala 51, no konsidera asaun deside fatin ba selebrasaun nee atu fo hanoin fila fali ba veteranus sira relembra dalan luta nian, neebe kobre mos foho Matebian, maibe triste ho selebrasaun refere, tanba planu barak mak Estadu Timor-Leste seidauk realiza iha faze ukun aan.
“Buat barak mak sira seidauk halo, tanba maluk barak mak oferese sira nia vida iha foho Matebian nee, maibe balu seidauk hetan rekoinhesementu,” Boulesa komenta.
Tuir nia, fatin neebe Governu deside atu selebra loron importante nee, espera Governu liu liu Ministeriu Asuntu Kombatentes Libertasaun Nasional bele hanoin hetan luta nain sira nia sakrifisiu neebe kontribui iha foho Matebian lori Timor Leste ba hetan independensia.
(tom)
