ZUMALAI, STLTIMORLESTE.com – Durante tinan barak ona, hahu husi okupasaun Indonezia too ohin loron, komunidade hela iha Zulo Knua, Postu Administrativu Zumalai, Munisipiu Covalima, uza deit bee posu.
Lia hirak nee hatoo husi komunidade Suku Zulo, Aldeia Lale, Marito Barros ba STL iha Zulo Knua, Segunda nee (15/06/2026).
“Ami neebe hela iha Zulo Knua, hanesan ita boot sira hatene, durante tinan barak nia laran ami uza deit bee posu too agora, ami tenke lori jeregen tama sai iha mota kuak hodi bele asesu bee moos, maibe iha tinan hirak liu ba estadu dada ona bee torneira, maibe ida nee hanesan promosaun deit, tanba bee torneira refere komunidade sira la uza too tinan estadu dada bee moos nee aat ona,” nia esplika.
Nia dehan, bee posu nee komunidade sira kuru sei sae foho tun foho, tanba komunidade balun hela dok oituan husi bee posu nee, iha tinan 2019 dada ona bee torneira ba komunidade sira nee, maibe kuaze uza tinan rua resin deit bee torneira nee la sai too ohin loron, komunidade sira nafatin uza bee posu.
“Baibain hau koalia beibeik ona katak, ami komunidade neebe hela iha Zulo Knua nee durante tinan barak ona uza deit bee posu, tanba ami tenke lori masa tun sae foho mak foin hetan bee moos hodi bele uza loron-loron, komunidade balun hela besik bee posu nee, maibe balun dok, presiza lao ain tun sae foho para bele asesu bee posu nee,” katak nia.
Nunee mos Maria de Jesus hanesan komunidade husi Suku Zulo, Aldeia Lale hatete, tempu udan bee posu nee nakonu, maibe bailoron bee menus, agora bee posu tolu nee nakonu, bee posu nee komunidade sira uza ba tein, haris no fase ropa.
“Ita bele dehan tempu udan bee posu nee nakonu, maibe bailoron bee menus, agora bee posu tolu nee nakonu, bee posu nee komunidade sira uza ba tein, haris no fase ropa, bee posu ida uza ba tein no hemu, maibe rua seluk uza ba haris no fase ropa,” nia deklara.
Tuir observasaun STL iha terenu katak, bee posu neebe komunidade balun hela besik nee nakonu, no komunidade sira sempre asesu bee posu refere, no bee posu rua seluk neebe durante nee komunidade sira uza ba fase ropa no haris nee nakonu, maibe bainhira atu asesu bee refere, presiza lao ain tun sae foho.
(jac)
