DILI, STLTIMORLESTE.com – Komunidade sira iha kapital no mos munisipiu sira kontinua kestiona no lamenta ho kualidade eletrisidade neebe la estavel. Problema ahi neebe voltajen sae tun no mate lakan beibeik laos deit atrapalha atividade loro-loron, maibe mos estraga ona sasan eletronika barak neebe komunidade sira sosa ho osan boot.
Alarico da Silva, nuudar komunidade ida husi Bairru Pite hatete, kestaun ahi mate lakan nee derepenti deit no lori prezuiju ba nia uma kain. Ninia jelera no televizaun foin lalais nee aat kedas tanba ahi mate lakan beibeik no voltajen la estavel.
“Ahi mate lakan nee derepenti deit. Foin lalais nee ami nia jelera no televizaun ida maka hetan estraga total, tanba ahi mate beibeik no voltajen la estavel. Sosa sasan sira nee ho osan boot, maibe tanba ho kualidade ahi neebe la diak, komunidade maka tenke lakon fali osan atu hadia ka sosa foun,” dehan Alarico ba STL, Sesta nee (12/06/2026).
Nia dehan, kbiit finanseira família nian iha situasaun neebe limitadu, maibe tanba nesesidade moris nian, sira obriga aan gasta fali osan seluk hodi selu tekniku atu hadia sasan sira neebe aat. Kestaun nee laos fali kbiit komunidade nian nuudar kliente, tanba pulsa eletrisidade nian nafatin sosa ka selu regular duni.
Iha parte ketak Komunidade Komoro, Maria Magno mos keixa katak hahan sira neebe rai iha jalera laran hanesan naan, ikan no seluk tan fasil tebes atu dodok tanba ahi mate lori oras barak.
(car)
