BAUKAU, STLTIMORLESTE.com – Komunidade Suku Werumata, Postu Administrativu Laga, Munisipiu Baukau enfrenta problema infraestrutura bazika.
“Durante nee komunidade Suku Werumata enfrenta problema bee moos, irigasaun inklui estrada liga husi Saelari mai Werumata,” hateten Xefe Suku Werumata, Sabino Martins ba jornalista STL iha Vila Nova Baukau, Kinta (15/05/2025).
Lideransa Suku nee esplika, natar eziste iha Suku Werumata liu hektare 100 neebe durante tempu okupasaun Indonezia too faze ukun aan kuaze funsiona, tanba kondisaun mota Batafu’u diak, maibe iha tinan 2014 impaktu husi udan rezulta estraga kanu hasa’a husi mota ba natar hetan estragus fo implika ba natar hektare liu 100 abandona, tanba la asesu bee.
Nia sunlina, kondisaun kanu hasa’a husi mota ba natar hetan estragus, komunidade natar nain sira esforsu ona ho sistema tradisional, maibe la konsege rezolve, tanba kotu aas ho distansia besik metru 10.
Kona-ba estrada, Suku Werumata vizinhu ho Suku Saelari neebe iha estrada rural kilometru 8, nuudar dalan alternativu ba komunidade sira husi Suku rua nia viajen ba malu besik liu, maibe daudaun kondisaun aat no grave, tanba estragus husi udan.
Nunee mos problema bee moos komunidade Suku Werumata enfrenta, tanba bee matan Abaresi neebe Governu liu husi parseiru dezenvolvimentu kanaliza ba komunidade uma kain liu 200 iha tinan 2017, daudaun kanalizasaun sira kuaze aat, tanba utiliza ona tinan naruk, nunee obrigatoriu komunidade lao distansia hafoin asesu bee moos hodi utiliza.
“Foin lalais enkontru iha Postu ASPA nian ami Suku foun aprezenta problema bee moos irigasaun, tanba ita nia komunidade la halo natar, maibe estrada nee Suku Saelari mak propoin ona,” Sabino Martins akresenta.
Lideransa Suku nee katak, problema infraestrutura bazika hanesan bee moos no irigasaun, parte Suku aprezenta ona iha reuniaun Asembleia Postu Administrativu (ASPA) neebe sei responde iha tinan 2026, enkuantu kona-ba estrada suku vizinhu Saelari mak propoin ona ba projetu 2026 suku nian.
Sabino Martins garante, iha tinan 2026 sei responde preokupasaun sira neebe daudaun komunidade enfrenta, tanba suku hetan alokasaun orsamentu husi Programa Nasional Dezenvolvimentu Suku hodi responde preokupasaun sira, mezmu ho fazeadamente.
Entretantu Suku Werumata rejistu Xefe familia 204 ho membru famila 840 husi Aldeia Werumata.
(tom)
