DILI, STLTIMORLESTE.com – Relasiona ho stok aimoruk item balun neebe daudaun nee hotu iha sentru saude sira, halo komunidade sira senti sai hanesan problema, tanba governu la tau atensaun hodi rezolve lalais.
Sidadaun Carmelita do Rosario hatete, problema stok aimoruk nee laos foin mak akontese iha tinan nee, maibe akontese ona tinan barak nia laran. Situasaun nee halo povu sira senti triste, bainhira ho kondisaun moras ba konsulta maibe aimoruk mak laiha hela deit. Ida nee hanesan problema ida neebe nasaun nee hasoru hela.
“Hau triste bainhira ba konsulta, mediku sira dehan aimoruk item ida nee laiha iha sentru nee, tanba nee ba sosa deit iha apotik sira. Rona ida nee halo ita laran susar no hanesan problema ida mai ita, tenke hasai fali osan ba sosa rasik iha apotik sira,” dehan nia ba STL iha HNGV Bidau, Segunda (20/07/2026).
Nia katak, governu labele husik hela situasaun nee lao kleur, povu kiik laiha osan atu ba sosa iha apotik sira. Nee mak sira hakat mai konsulta iha sentru saude publiko sira, hodi hetan aimoruk ho gratuitu nee.
Nunee mos Pasiente Carlos Beremau katak, bainhira ba konsulta iha sentru saude balun, tanba aimoruk amoxicilin laiha entaun mediku haruka ba sosa deit iha apotik.
Hatan ba kestaun nee, Diretor Servisu Saude Munisipiu Dili, Mateus Pinto hatete, stok aimoruk hanesan ema hotu hatene too agora iha item balun laiha.
“Ita hotu hatene too agora iha item balun laiha neebe halo ulun moras hela. Hanesan kona ba parasetamol no amoxicilin hau hanoin ditribui naton ba iha sentru saude sira,” dehan nia ba jornalista foin lais nee.
Nia haktuir, kona ba amoxicilin nia parte kontaktu ona ba INFPM stok out duni.
“Ho ida nee hau husu oinsa ho ita nia kompras, sira dehan ita nia kompras iha dalan, entaun ita hein deit mak foin too. Sira mos fo hatene katak, ita husu fali iha rejional sira hanesan Baucau no Maliana, para oinsa sira nian neebe naton iha neeba bele fo fali balun mai Dili,” nia dehan.
Nia hatutan, situasaun mak nee, neebe rejional bele ajuda para fo fali balun. Kona ba SF koordena ona mos ho DPO ka xefi sira servisu kona ba maternidade nian, hodi komunika ba sentru saude no rejional sira iha karik fo fali balun mai Dili, mais dala ruma sira la fo tanba inan isin rua iha neeba mos barak.
(dom
