DILI, STLTIMORLESTE.com – Komunidade Ulmera, Postu Administrativu Bazartete, Munisipiu Liquica, uma kain 45 seidauk asesu ba linha eletrisidade, tanba hela iha area rurais.
Preokupasaun nee hatoo husi Xefe Suku Ulmera, Martinho Coreia ba STL iha Bebora, Tersa nee (30/06/2026).
Martinho hatete, 90% komunidade asesu ba eletrisidade, maibe iha area rural aldeia ida seidauk asesu.
“Ami nia komunidade kuaze uma kain 45 seidauk asesu ba linha eletrisidade, tanba hela iha area rurais,” dehan nia.
Komunidade neebé seidauk asesu ba eletrisidade, hahu ukun aan too mai agora.
Oinsa iha kalan fo netik naroman hodi han no estuda, mak komunidade inisiativa hola rasik fiu dada manual uza ai halo ba riin dada fiu too sira nia uma.
Nuudar Autoridade lokal la tur nonok, maibe buka dalan mak halo proposta ba ministeriu relevante, maibe too agora seidauk iha resposta.
Nia haktuir, kuandu ukun atu goza laos ukun aan para ema sai bainaka ba nia rain hela iha nakukun laran, ida nee mak ema dehan ukun aan ba deit ema balun, tanba balun sente ukun no balun lae, ida nee sai preokupasaun.
Tanba komunidade nafatin moris iha sofrimentu nia laran, sei halerik ba eletrisidade, bee moos no seluk tan.
Total populasaun Ulmera hamutuk 4000, kompostu husi aldeia sia mak hanesan Ermera, Esirat, Fatubesilolo, Manaemunu, manemori, Nauner, Neran, Terlau no Tetsari.
(joa)
