ZUMALAI, STLTIMORLESTE.com – Komunidade neebe hela iha Zulo Knua preokupa tebes ho kondisaun estrada neebe husi Diresaun Zulo Knua viajen ba Zumalai kotu, tempu udan difikulta tebes komunidade sira.
Haktuir Komunidade Suku Zulo, Aldeia Lale, Postu Administrativu Zumalai, Munisipiu Covalima, Marito Barros ba STL iha Zulo Knua, Tersa nee (16/06/2026).
“Ami iha Zulo Knua nee hanesan ita boot sira hatene katak, uluk rai halai, agora udan la para, estrada parte besik leogol neeba nee kotu ona, bainhira udan difikulta tebes ami nian viajen husi Zulo Knua ba Zumalai Vila, no husi Zumalai mai iha Zulo Knua nee difikulta tebes ami neebe uza transporte hanesan motor no kareta, oinsa mak estadu ida nee bele hadia emerjensia kondisaun estrada neebe ohin hau mensiona,” nia esplika.
Tuir nia, bainhira udan la para nee kareta sira nee tenke lori tali mak dada, tanba estrada nee kotu nakonu ho tahu, bainhira la udan tahu maran, maibe nafatin difikulta komunidade sira, tanba kondisaun estrada iha parte balun hahu aat nakonu ho fatuk.
“Ami husu ba governu ida nee se bele hadia no ateru lalais estrada neebe kotu ona, tanba udan sempre difikulta tebes sira nian viajen ba mai, lao kalan nee susar tebes, pior liu tan mak iha tempu udan nee,” nia afirma.
Nunee mos Rafael Mendonca nuudar joven iha Suku Zulo hatete, los duni bainhira udan la para nee difikulta sira, tanba kondisaun estrada iha parte Leogol ninia nee kotu ona, iha tempu udan kareta liu susar tebes, motor atu liu tenke halai neineik, foin dadaun trek ida lori tali mak dada tanba mout iha estrada klaran, halo kareta seluk labele liu.
“Los duni katak, bainhira udan la para nee difikulta sira, tanba kondisaun estrada iha parte Leogol ninia nee kotu ona, iha tempu udan kareta liu susar tebes, motor atu liu tenke halai neineik, foin daudaun trek ida lori tali mak dada, tanba mout iha estrada klaran, halo kareta seluk labele liu,” nia akresenta.
(jac)
