DILI, STLTIMORLESTE.com – Komisariu Komisaun Anti Korupasaun (KAK) halo ona komunikasaun ho Prokurador Jeral Republika (PJR) atu delega hikas kazu korupsaun ba KAK.
“Hau hanoin servisu investigasaun lao hela, komisariu mos iha komunikasaun ho PJR, espera katak iha tempu besik PJR mos ho nia Prokurador sira bele redelega fali prosesu sira nee mai para ita bele halo fali servisu investigasaun nee bele lao diak,” dehan Komisariu Rui Pereira dos Santos ba jornalista sira, hafoin enkontru ho empreza manan nain ba dezenhu konstrusaun edifisiu KAK, Farol, Sesta (22/05/2026).
Nia dehan, orsida macet iha nee ema dehan iha nee mak la halo servisu, macet iha neeba ema dehan neeba mak la halo servisu.
Komisariu rasik halo komunikasaun ho PJR katak, prosesu sira neebe mak iha redelega fila fali mai para iha servisu hamutuk atu prevene no kombate korupsaun, se lae buat hotu macet ema haklalak no hakilar ladun diak.
Komisariu sublina, komisariu rasik sei koalia ho PJR promete hela katak, tempu besik sei redelega prosesu sira nee mai para bele klonklui investigasaun, tanba kazu balun neebe investiga ona iha klaran, balun besik atu hotu ona, balun foin atu hahu. Tanba nee mak hanoin servisu sira nee espera PJR bele ho nia estrutura ho Prokurador titular bele tau konsiderasaun komisariu nia liafuan neebe tatoli hela PJR.
Nia akresenta, atividade invetigasaun no inspesaun kontinua lao, formasaun mos kontinua lao nain lima ba Malazia foin fila, nain rua ba tuir enkontru foin fila grupu ida ba formasaun administrasaun finansas lojistika iha Jogza foin fila, husik hela grupu ida atu KPK mak sei organiza, tanba tinan nee ekipa boot prevensaun korrupsaun sei ba KPK.
Komisariu konfirma katak nia lakohi fo sai motivu lo-loos PJR avoka prosesu, razaun nee PJR mak hatene. Maibe komisariu komunika ona PJR para servisu sira nee bele lao, tanba PJR mak nain ba prosesu, maibe nain mesak labele halo buat ida tenke servisu hamutuk orgaun Polisia kriminal sira nee, no mos ita nia sosiedade sira hotu.
Profunda, buat ida korupsaun nee laos krime ida be ema hotu hotu haree lisuk , korrupsaun nee nia halo buat ruma falla nee so ema sira neebe servisu hatene nee, tanba nee mak kazu korrupasaun nee bele dehan kazu estraordinariu, nia tratamentu nee estraordinariu labele hanesan krime komun.
Nia dehan, babain oho ema ida ita hatene tuir katak, lori tudik mak fai ka katana mak taa, ga fatuk mak tuda ga buti mak mate ga ita hatene. Maibe envolvimentu krime korrupasaun ninian lalaok nee oin seluk ka ninian elementu krime oin seluk tanba nee nia nivel tratamentu oin seluk.
Iha fatin ketak, Akademiku UNTL, Rafael de Jesus dehan, KAK ho PJR servisu hamutuk hodi kombate aktu korupsaun.
“Hau hanoin presiza servisu hamutuk hodi kombate aktu korupsaun, se servisu mesak bele fo fatin ba ema balu aproveita hodi halo korupsaun,” dehan nia.
Afirma tan, maske mosu dezentendementu, maibe fiar ba oin KAK ho PJR sei iha relasaun metin, servisu no kombate korupsaun.
(ter)
