DILI, STLTIMORLESTE.com – Uniforme bá eskola publiku hanesan farda nasional obrigatoriu bá estudante hotu tenke uza, maibe tanba kondisaun inan aman halo alunus balun seidauk bele uza farda nee.
Koordenador Eskola Basico Fillial (EBF) 12 de Outubro, Fernando Bareto hatete, farda nasional nee obrigatoriu bá estudante hotu tenke uza. Iha eskola nee uza farda fahe tuir orariu, bá primeiru too terseriu ano uza iha Segunda no Kuarta, bá kuatru too sexto ano uza iha loron Segunda ho Tersa deit, tanba farda seluk laiha ona, bá Kuarta no Kinta uza fali farda anterior nian, nunee mos Sesta no Sabadu.
Nia dehan, bá estudante sira neebe seidauk uza farda nasional nee, eskola bolu ona inan aman mai koalia maibe balun dehan osan seidauk iha neebe fo tempu lai bá sira. Inan aman sira koopera atu sosa maibe sei haree lai kondisaun.
“Bá estudante sira neebe seidauk uza farda nasional nee, ami labele obriga inan aman atu sosa lalais, tanba kondisaun ema hotu la hanesan. Ami fo hatene bá sira katak too ezame, estudante hotu tenke uza farda nasional. Neebe dala ruma iha segundu periodu nee hotu-hotu bele uza ona, iha primeiru periodu nee ami koko hela mais seidauk bele, tanba kondisaun ita ema idak-idak nian la hanesan,” dehan nia bá STL iha nia knaar fatin EBF 12 de Outubro Tasi-Tolu, Kinta (11/06/2026).
Nia dehan, farda nasional nee par ida ho folin US$ 14 no farda jinastika par ida US$ 10, entaun oin rua nee hamutuk US$ 24.
Entretantu Maria Fatima Gomes, inan husi Estudante hatete, eskola la obriga atu sosa lalais farda nee bá oan sira, maibe tenke sosa duni atu labarik sira uza bá eskola. Neebe hakarak ka lakohi inan aman tenke sosa fo bá oan sira uza hodi ba eskola.
“Hau mos foin sosa farda nee bá hau nia oan uza, tanba osan seidauk iha. Labarik nain 5 eskola hotu, nain 2 iha São Pedro, 2 iha EBC 30 de Agosto, neebe haree uluk nia maun ho bin sira nian mak depois alin kiik nian. Neebe agradese bá eskola sei fo tempu bá inan aman sira hodi sosa,” dehan nia.
Nia hatutan, obrigasaun inan aman sira tenke sosa duni fo bá oan sira uza, tanba eskola gratis maibe kona-ba farda nee tenke sosa fo bá labarik sira uza.
(ter)
