BAUCAU, STLTIMORLESTE.com – Kondisaun infraestrutura ba edifisiu eskola Ensinu Baziku Filial (EBF) primeiru segundu siklu Ueru-Mata, iha Postu Administrativu Laga, Munisipiu Baucau, sala aprendizajen hamutuk haat (4) kondisaun aat, iha neebe tempu udan no anin impede prosesu aprendizajen.
Koordenador eskola EBF Ueru-Mata, Jacinto Martins aprezenta, edifisiu eskola EBF Ueru-Mata sala haat neebe atual kondisaun aat ba estudante primeiru anu too kuartu anu, neebe konstrui iha tinan 1983. Edifisiu sala haat refere neebe atual kondisaun aat, iha parte fondasi inklui parede sira hahu nakfera, tanba nee bainhira prosesu aprendizajem lao mak anin no udan boot obrigado prosesu aprendizajen tenke para haruka estudante fila uma.
“Kuandu tempu udan ami haruka labarik sira sai, tanba ami tauk ita nia vida tenke asegura,” hateten Jacinto Martins ba jornalista sira iha nia knaar fatin Ueru-Mata, Sesta (05/06/2026).
Nia komenta, problema refere parte eskola diriji ona ba Servisu Munisipal Edukasaun Baucau no hetan ona resposta iha tinan 2023 liu husi halo levantamentu dadus iha terrenu atu konstrui hikas sala haat foun ba estudante sira husi primeiru anu too kuartu anu, maibe too ohin loron seidauk iha rezultadu.
Asaun nee, koordenador eskola EBF Ueru-Mata sente triste, tanba kondisaun eskola aat fo ameasa ba estudante sira nia vida, maibe parte Edukasaun la tau ba prioridade atu halo konstrusaun foun hodi substitui sala tuan refere.
“Kondisaun hanesan nee ami uza deit ona mais, se diak deit nee diak, maibe buat ruma la diak fali, keta dehan fali koordenador nian, maibe buat nee boot sira mos mai haree ona,” Jacinto kestiona.
Koordenador eskola nee husu Servisu Munisipal Edukasaun Baucau atu seriu ba edifisiu eskola EBF Ueru-Mata sala haat neebe atual kondisaun aat liu husi koordenasaun ho Ministeriu Edukasaun, nunee bele halo konstrusaun sala foun ba estudante sira, tanba sala haat neebe atual aat, planu ba reabilitasaun mos labele, tanba sala refere konstrui iha tempu okupasaun Indonezia.
Liga asuntu nee STL atu tenta komfirma Diretor Servisu Munisipal Edukasaun Baucau, maibe laiha fatin atu fo komentariu.
Entretantu EBF Ueru-Mata iha estudante hamutuk nain 99 kompostu feto mane husi primeiru anu too sestu anu ho total profesores permanente nain 6 inklui Koordenador eskolar.
(tom)
