BAUKAU, STLTIMORLESTE.com – Prienxe kondisaun minimas ba implementasaun poder lokal, Munisipiu Baukau falta kondisaun infraestrutura.
Prezidente Autoridade Munisipiu Baukau, Veneranda Lemos esplika, parte nasional fo atensaun minimu ba Munisipiu Baukau, tanba Baukau tama hotu iha lista avaliasaun konsdisaun minimas implementasaun poder lokal, nunee hanesan Baukau oan hakarak Baukau implementa Governu lokal tenke rona malu.
“Hau fiar katak atu prienxe kondisaun minimas Baukau tama, tanba rekursu umanus ita preparadu falta mak infraestruturas deit, mais tinan ida nee mak infraestruturas estradas urbanas, estrada ponte balun iha postu mak husu mai bele hatan, hau fiar katak ita bele,” hateten Veneranda Lemos ba jornalista sira iha Vila Nova Baukau, Kuarta (05/06/2025).
Nia sublina, kona-ba rekursu umanus Munisipiu Baukau garante, tanba barak daudaun balun servisu iha Munisipiu Baukau no balun servisu iha Dili, maibe bainhira hirak neebe servisu iha Dili hakarak muda servisu iha fali Baukau, rekursu umanus forte liu ona hodi hatan.
Maibe infraestrutura liu-liu estrada urbanas iha Baukau Vila no kondisaun ponte inklui estrada ba Postu sira, bainhira prosesu hotu hatan liu husi reabilitasaun no konstrusaun, Baukau bele prienxe implementa poder lokal.
“Baukau nee kuandu loke komunikasaun ba ema hotu, ema hotu-hotu prontu, tanba Baukau ita hotu nian, entaun ita loke komunikasaun ho setor hotu kontribui,” katak Venerada Lemos.
Tuir Prezidente Autoridade Munisipiu Baukau nee katak, atu implementa poder lokal husu sidadaun Baukau oan hotu nia kontribui, nunee bainhira implementa fo benefisiu ba Munisipiu, tanba bainhira implementa Munisipiu sei jere rasik nia administrasaun.
Entretantu tuir informasaun neebe STL asesu, loron 09 too 16 ekipa avaliador ba kondisaun minimas implementa poder lokal sei prezensa iha Munisipiu Baukau hodi avalia kondisaun minimas.
(tom)
