DILI, STLTIMORLESTE.com – Konfrontu iha Bekae, Postu Admnistratvu Nain Feto, Munisipiu Dili, Polisia Nasional Timor Leste (PNTL) detein suspeitu nain ida (1), tanba deskonfia sona kanek vitima ho insial TF.
Segundu Komandante PNTL Munisipiu Dili, Superientidente João Pires hatete, horikalan maizumenus tuku 10 liu akontese kazu ida iha Bekae, Postu Admnistratvu Nain Feto, Munisipiu Dili nian, patrulhamentu no OPS sira ba too iha fatin identifika iha grupu rua mak konfrontu.
Nia dehan, Grupu ida hemu tua lanu hela ho tan grupu seluk sadik malu, konsege patrulhamentu too hodi asegura.
“Maibe ida kanek tiha ona, aproveita ita foti kedas suspeitu nee, vitima evakua kedas ba hospital, no suspeitu uza hela tudik ida mak sona, entaun sai hanesan evidensia, ita foti kedas suspeitu nee lori mai ita nia fatin hodi prosesu hela ba 72 oras, molok entrega ba Ministeriu Publiku,” dehan nia ba jornalista sira iha Kaikoli, Dili, Kuarta (23/10/2024).
Nia hatutan, kazu ida nee arma branka, krimi agravadu entaun lori hela ba hodi prosesu.
“Numeru ita tau tiha ona 210, neebe prosesu hela ba Ministeriu Publiku,” katak nia.
Nia informa, atu reduz kazu sira nee labele akontese beibeik, Komando orienta ona eskuadra sira atu halo patrulhamentu ba fatin sira neebe deskonfia risku ba krimi.
(mar)
