BAUCAU, STLTIMORLESTE.com – Projetu konstrusaun Merkadu Munisipal Baucau neebe implementa husi kontraktor Fujian Yongtai Constraction Group Co.Lda joint venture Suhurama Developer, Unipessoal Lda ho valor US$ 7.139,218,43, durasaun servisu tinan 2 neebe lansa fatuk dahuluk iha loron 12 Fevereiru 2026 foin hakat ba kee fondasi.
Xefe divizaun konstrusaun Fujian Yongtai construction group co, Ltd. Joint venture suhurama developer unipessoal lda, Jose U..Natalino de Sa hateten, tuir lo-loos parte kompanhia hahu servisu ona hafoin remata serimonia lansamentu ba projetu refere, maibe infrenta problema mak fatin konstrusaun la defini tuir dezenhu kontratu neebe parte kompanhia ho Governu deside, nunee atual implika ba progresu fiziku iha terrenu.
“Lo-loos ami nia fatin servisu iha oin, maibe sira husi MCI ho PAM nian haruka ami muda fali ba kotuk, nunee ami tenke halo revizaun ba espansaun nee, nee fo impaktu ami foin mobilisasi iha tanggal 14 Abril nee,” hateten Xefe divizaun konstrusaun, Jose U. Natalino de Sa ba STL iha fatin konstrusaun Tuanau, Tersa (02/06/2026).
Nia esplika, hafoin remata mobilizasaun ekipamentus pezadu iha terrenu no servisu neebe parte kompanhia halao atinji ona mak, halo alargamentu ba fatin konstrusaun, ateru rai no atual kee fondasi ba konstrusaun merkadu refere.
Nia sublina, problema neebe difikulta kompanhia atu aselera kee fatin fondasi ba konstrusaun refere mak, kauza husi rai iha fatin konstrusaun domina ho fatuk, maibe parte kompanhia sei aselera servisu refere no bainhira finaliza kee fondasi sei hakat ba servisu sira tuir mai, nunee bele finaliza projetu konstrusaun refere tuir kontratu neebe selebra ona.
“Importante mak nia fondasi nee, kuandu ida nee mak kompleta hotu ona ami sei servisu hamutuk ho autoridade prepara ema bele la too tinan rua konstrusaun nee hotu ona,” Jose komenta.
Nia informa, atualidade servisu iha terrenu hanesan kee no ateru atinji ona 30% no tuir planu sei finaliza servisu refere iha fulan ida tuir mai hafoin kontinua ba servisu seluk hanesan cor, hada batako no seluk tan, sei koordena ho Autoridade Munisipal no suku hodi koloka trabalhador Baucau oan servisu iha konstrusaun refere.
Entretantu revizaun dezenhu neebe iha antes nee portaun entrada ba merkadu refere iha oin, maibe atual difikulta kompanhia atu ezekuta, tanba nee sei koordena ho parte ministeriu relevante nunee foti dezisaun ba kestaun refere.
Enkuantu kona-ba uma ba negosiante sira iha merkadu refere mantein, jardin no fasilidade seluk tan, maibe la inklui terminal ba transporte publiku sira, tanba la inklui iha dezenhu.
(tom)
